Astanada joǵalǵan oqýshylar tabyldy
ASTANA. 28 qazan. QazAqparat - Astana qalasynyń ishki ister departamentine elordadaǵy mektepterdegi daıyndyq, birinshi jáne ekinshi synypta oqıtyn balalary sabaqtan soń úıge kelmegenin aıtyp, ata-analary aryz bildiredi.
ІІD habarlaǵandaı, olarǵa balalary joǵalǵanyn aıtyp, qatty qoryqqan ata-ana keledi. Olardyń aıtýynsha, daıyndyq synybynda oqıtyn 6 jastaǵy balasy mektepte kidirip qalǵan. Ony ákesi kútip alý kerek edi, alaıda ol ýaqytynda kele almaǵan. Sonyń nátıjesinde bala ózi avtobýsqa otyryp, óz aıaldamasynan ótip ketedi de marshrýt baǵytynyń basynan sońyna deıin júrip shyǵady. Bala ábden keshqurym tabylyp, ata-anasyna aman-esen qaıtarylady.
Basqa mektepte de osyǵan uqsas jaǵdaı bolady. Aryz bildirgen áıeldiń birinshi synypta oqıtyn uly men ekinshi synypta oqıtyn jıeni mektepten soń úıge qaıtyp kelmegen. Kámelettik jasqa tolmaǵandardyń isi jónindegi ınspektor balalardy ájeleri kútip alý kerektigin anyqtaǵan, alaıda ájeı de ýaqytynan keshigip qalǵan. Balalar ózderi úıge jetpek bolǵan. Іzdeý jumystarynyń barysynda polıtsııa qyzmetkerleri olardy «Mega» oıyn-saýyq ortalyǵynan tabady.
Astana qalasy Іshki ister departamentiniń kámelettik jasqa tolmaǵandar isi jónindegi bóliminiń bastyǵy polıtsııa podpolkovnıgi Zúlfııa Jaqupovanyń aıtýynsha, qalada úıleri men mektep arasy óte alys ornalasqan oqýshylar jeterlik. Sondyqtan ata-analary olardyń qaýipsizdigine kóńil aýdaryp, olardy mektepten ýaqytynda kútip alýlary kerek.
