Astanada joǵalǵan adamdardy izdeýge drondar qoldanylyp jatyr
ASTANA.KAZINFORM — Elordada joǵalǵan azamattardyń júrgen jerin anyqtaýǵa baǵyttalǵan jedel-izdestirý is-sharalaryn júrgizý kezinde ushqyshsyz ushý apparattary qoldanylady.
— Drondar jer ústinen izdestirý qıyn nemese múmkin emes jaǵdaılarda qoldanylady. Atap aıtqanda, sý aıdyndarynda, qamys qalyń ósken aýmaqtarda, orman beldeýlerinde, batpaqty jerlerde, sondaı-aq qalalyq beınebaqylaý júıesi qamtymaǵan aýmaqtarda paıdalanylady. Áýeden sholý jasaý arqyly polıtsııa qyzmetkerleri keń aýmaqtardy jedel qarap shyǵyp, izdeý baǵytyn jyldam anyqtaı alady, — delingen ІІM habarlamasynda.
Jyl basynan beri elordada azamattardyń iz-túzsiz joǵalýyna qatysty 3 myńnan astam ótinish tirkelgen. Olardyń qatarynda kámeletke tolmaǵandar da, eresekter de, onyń ishinde egde jastaǵy azamattar da bar. Sondaı-aq balyq aýlaýǵa nemese serýendeýge shyǵyp, túrli sebeptermen baılanysqa shyqpaı qalǵan azamattarǵa qatysty jaǵdaılar da jıi kezdesedi.
Osyndaı jaǵdaılarda drondardy paıdalaný izdestirý jumystaryn edáýir jedeldetýge, aýmaqtardy tekserýge ketetin ýaqytty qysqartýǵa jáne jetýi qıyn jerlerdegi izdeý jumystarynyń tıimdiligin arttyrýǵa múmkindik beredi. Birqatar jaǵdaıda áýeden júrgiziletin monıtorıng iz-túzsiz joǵalǵan adamdardy tabýǵa nemese olardyń bolýy múmkin aýmaǵyn naqtylaýǵa yqpal etedi.
Zamanaýı tehnologııalardy qoldanýmen qatar, izdestirý jumystaryna polıtsııa qyzmetkerleri men qyzmettik ıtter de tartylady. Jedel qyzmette tehnıkalyq quraldardy engizý izdestirý jumystarynyń nátıjeliligin arttyryp, azamattardyń ótinishterine jedel den qoıýǵa múmkindik beredi.
Aıta ketelik polıtsııa qyzmetkerleri drondardy basqarý boıynsha daıyndyqtan ótip jatqany týraly jazǵan edik.
