Astanada jobalaý men qurylysqa ruqsat berý protsedýralary jeńildetiledi
ASTANA. QazAqparat - Qala qurylysy jáne sáýlet máseleleri boıynsha ótken keńeste elorda ákimi Áset Isekeshev óziniń birinshi orynbasary Sergeı Horoshýnǵa Astana qalasynda jobalaý men qurylysqa ruqsat berý protsedýralaryn aıtarlyqtaı jeńildetýdi jáne onyń aıqyndylyǵyn qamtamasyz etetin ońtaıly algorıtm ázirleýdi tapsyrdy.
Aldaǵy ýaqytta qala qurylysy jáne sáýlet basqarmasyyń qyzmetteri barynsha qoljetimdi bolady. Osy maqsatta qyzmetterdi elektrondy formatqa kóshirý jumystary qolǵa alyndy. Sonymen qatar, «Elektrondy sáýlet» bazasy jasalady, dep habarlaıdy ákimdiktiń baspasóz qyzmetinen.
Osylaısha, «eskızdik jobalardy kelisý», «syrtqy jarnama ornatý», jobalaý men qurylysqa ruqsattar, rekonstrýktsııaǵa sheshimder berý sııaqty qyzmetterdi usyný barysynda ákimshilik tosqaýyldar qysqartylady. Jalpy, qala qurylysy, sáýlet jáne qurylys qyzmetiniń sýbektilerine basqarmanyń 25 qyzmetin paıdalaný úshin elektrondy kanal ashylady.
Qyzmetterdiń jańa formaty kezeń-kezeńmen engizilmek. Búginde eskızdik jobalardy kelisý boıynsha elektrondy qyzmet pılottyq rejımde usynylyp jatyr, qalǵan qyzmetter jaqyn arada elektrondy formatqa kóshirilmek.
