Astanada «Jilik syndyrýdan» respýblıkalyq chempıonat ótti

Dodaǵa Pavlodar, Aqmola jáne Soltústik Qazaqstan oblystary men Astana qalasynyń, sondaı-aq Tótenshe jaǵdaılar mınıstrliginiń komandalary qatysyp, ózara baǵy men babyn synady.
Astana qalasyndaǵy «Ulytaý» dene shynyqtyrý-saýyqtyrý kesheninde (Barshyn kóshesi, 30/2) ótken jarysta ártúrli jas sanatyndaǵy qatysýshylar bilek kúshi men tózimdiligin kórsetti.

Uıymdastyrýshylardyń aıtýynsha, jilik syndyrý – qazaq halqynyń ǵasyrlar boıy jalǵasyp kele jatqan ulttyq dástúrleriniń biri. Onyń máni – jilik súıegin qoldyń kúshimen syndyrý. Bul saıys qatysýshylardan kúshti, tózimdilikti jáne sheberlikti talap etedi.

«Jilik syndyrý – qazaq jigitteriniń qaırat-kúshin synaıtyn dástúrdiń biri. Jilik syndyrýǵa kúshpen birge aıla-tásil de kerek. Ásirese taıdyń jiligin syndyrý óte qıyn.

Ádette qoı súıekteriniń ishinde uryp syndyrýǵa domalaq jiligi ońtaıly. Taı súıekteriniń ishinde jilinshik alynady.

Urýdyń da ádisi bar: kóldeneńnen emes, uzynnan urǵan utymdy. Búgingi jarysta sol mashyqtyń bárin meńgergen myqty jigitter baq synady. Olar jylqy malynyń ortan jáne toqpan jiligin syndyryp, kúshin kórsetti», – deıdi uıymdastyrýshy, «Myqty bilek» ulttyq oıyny qoǵamdyq birlestiginiń tóraǵasy Hamza Shýbaev.

Jarys sońynda 18-37 jas aralyǵy boıynsha 1 oryndy QR Tótenshe jaǵdaılar mınıstrliginiń myqtylary ıelense, 2-oryn Aqmola oblysynyń jigitterine, al 3-oryn Soltústik Qazaqstan oblysynan qatysqan azamattarǵa berildi. Sonyme qatar 38-49 jas aralyǵynda 1-oryndy Aqmola, 2-oryndy SQO, 3 oryndy Pavlodar oblystarynyń qatysýshylary aldy. Odan ári 50-61 jas aralyǵynda úsh oryndy SQO, Aqmola, Pavlodar oblystary ózara bólisti. 62 jastan joǵary qatysýshylar arasynda Pavlodar, SQO, Aqmola oblystarynyń qatysýshylary jeńis tuǵyrynan kórindi.

Jeńimpazdar men júldegerler arnaıy dıplomdar jáne syılyqtarmen marapattaldy.