Astanada JKO-dan zardap shekken oqýshy aýrýhanadan shyǵarylady
ASTANA. QazAqparat - Astanada «Lexus» markaly kólik jasaǵan jol-kólik oqıǵasy saldarynan zardap shekken 14 jasar bala aldaǵy juma kúni aýrýhanadan shyǵady. Bul týraly qalalyq densaýlyq saqtaý basqarmasynan habarlandy.
Aıta keteıik, jol-kólik oqıǵasynan jaraqat alǵan balaǵa ota jasalyp, búıregi men kókbaýyry alynyp tastaldy.
«Shamamen, naýqasty osy aptanyń sońyna qaraı, ıaǵnı juma kúni aýrýhanadan shyǵaramyz. Qazirgi kezde ol em qabyldaýda, jaǵdaıy turaqty. Barlyq qajetti em-dom jasalyp jatyr, dárigerler balanyń emdelýi úshin qoldan kelgenniń barlyǵyn istep jatyr», - dep habarlady «QazAqparatqa» baspasóz qyzmetiniń ókili.
Basqarma málimetinshe, qazirgi kezde balanyń janynda anasy bar, sondaı-aq kúnine eki márte oǵan jaqyndary kelip turady.
Esterińizge sala keteıik, 7 qyrkúıekte Imanov pen Asan Qaıǵy kósheleriniń qıylysynda jol apatynan tórt bala zardap shekken bolatyn.
Aldyn ala málimetterge qaraǵanda, Asan Qaıǵy kóshesimen kele jatqan «Lexus» avtokóliginiń 36 jastaǵy júrgizýshisi Imanov kóshesiniń qıylysynda «Mersedes» kóligine jol bermesten ótýge umtylyp, soqtyǵysqan bolatyn.
Kólik soqtyǵysynan «Lexus» júrgizýshisi rýldi buryp, kámeletke tolmaǵan jaıaý júrginshilerdi basyp, jol boıynda turǵan «Lada» kóligin de túıip ótken. Budan soń, «Lexus» kóligi soqqynyń qattylyǵynan «ZAZ» markaly kóligine qaraı aýdarylyp, ol bolsa serpinmen taǵy bir «Mıttsýbısı» markaly kólikti soqqan. Jol-kólik oqıǵasy saldarynan jaıaý júrginshi tórt bala zardap shekti. Atap aıtqanda, 2002 jyly, 2005 jáne 2007 jyly týǵan tórt bala ártúrli dene jaraqatymen aýrýhanalarǵa jetkizildi.
