Astanada JITS-ten kóz jumǵandardy eske alý sharasy ótti
ASTANA. QazAqparat - Jyl saıyn mamyr aıynyń úshinshi jeksenbisinde JITS qurbandaryn eske alý kúni bolyp atalyp ótedi. Aıtýly data qarsańynda elordadaǵy beldi oqý oryndarynyń biri - Qazaq tehnologııa jáne bıznes ýnıversıtetinde jastar arasynda «Umytpa, Ózińdi saqta!» atty aktsııa uıymdastyryldy, dep habarlaıdy QazAqparat.
Astana qalalyq JITS-ke qarsy kúres ortalyǵynyń uıymdastyrýymen ótken sharaǵa 500-ge jýyq qalalyq stýdent jastar men joǵarǵy synyp oqýshylary qatysty. Shara barysynda qatysýshylardyń 81-i óz erikterimen jedel test arqyly AITV-ǵa qan tapsyrdy.
Sharanyń negizgi maqsaty - AITV-nyń taralý joldaryn jastar arasynda nasıhattaý. Oǵan sebep te joq emes. AITV ınfektsııasyn juqtyrýshylardyń arasynda órimdeı jastardyń kezdesetinin qynjylyspen aıtyp ótken ortalyqtyń bas dárgeri S.Abdraıymov: «Búgingi kúni AITV máselesi tek qana medıtsına qyzmetkerlerin ǵana emes, búkil qoǵamdy alańdatyp otyrǵan másele. Ásirese ózderińiz sııaqty qyrshyn jastardyń osy aýrýdyń «qaqpanyna» iligýi bizge úreı týǵyzyp otyr. Sol sebepti de biz sizdermen jıi júzdesip, aýrýdyń aldyn alý maqsatynda osyndaı is-sharalardy jıi uıymdastyryp otyrsaq jumysymyz nátıjesiz bolmas dep oılaımyn», - dedi.
Sondaı-aq qatysýshylar nazaryna kontserttik baǵdarlamalar usynyldy. Al shara barysynda óner kórsetken «Vıdergebýrt» nemis-qoǵamdyq birlestiginen kelgen jastardyń qoıylymy erekshe este qalarlyq boldy. Jastar ádemi is-qımyldarymen shalys basqan ár qadamnyń sońy ókinishke ákeletinin áserli jetkizdi. Mamandar tarapynan daıyndalǵan vıktorınalyq suraq-jaýap oıynyna da jastar belsene atsalysty.
Mamandar atqarylyp jatqan is-sharalarynyń nátıjesiz qalmaıtynyn aıtyp, jınalǵan jastarmen birge «qysqa ǵumyrda, mándi ómir súreıik!» degen asqaq armanmen qyzyl tústi sharlardy aspanǵa ushyrdy.
Aıta keterligi, elordada sońǵy 20 jyl ishinde AITV juqpasymen 1293 adam tirkelgen. Osynyń 39-y JITS-tiń saldarynan kóz jumǵan.
