Astanada jylý berý maýsymyna daıyndyq júrip jatyr
ASTANA. KAZINFORM — Astana qalasynyń ákimi Jeńis Qasymbek Instagram paraqshasynda elordada jylý berý maýsymyna daıyndyq júrip jatqany týraly jazdy.
— Kúz-qys kezeńin turaqty ári qaýipsiz ótkizý — qalanyń qalypty tirshiligin qamtamasyz etýdegi negizgi máselelerdiń biri. Sondyqtan elordany jylytý maýsymyna daıyndaý jumysyn kóktemnen bastap qolǵa alamyz. Bul rette jylý energetıkasy keshenin jóndep, jańǵyrtýmen qatar, ınjenerlik ınfraqurylymnyń iri nysandaryn salý jumysyn da júrgizip jatyrmyz.
Bıyl JEO-1-de 10 qazandyq pen 3 týrbınany, al JEO-2-de 14 qazandyq pen 6 týrbogeneratordy jóndeý josparlanǵan. Sonymen qatar, jylý jelileriniń 7,5 shaqyrymyn kúrdeli jóndeýden ótkizip, rekonstrýktsııalaımyz. Sol sııaqty, 67,4 km áýe jáne kabel jelisin, 68 taratý jáne transformatorlyq qosalqy pýnktin, elektr jelisi ınfraqurylymynyń ózge de nysandaryn jóndeý kózdelip otyr, — dedi Jeńis Qasymbek.
JEO-2-niń sý jylytatyn qazandyǵyn keńeıtý jáne rekonstrýktsııalaý jumysyn júrgizip, № 7 jáne № 8 sý jylytatyn qazandyqtardy ornatylyp jatyr.
— Sonymen qatar, qalanyń qarqyndy damýyn eskere otyryp, qajetti jaǵdaı jasaýǵa baǵyttalǵan birqatar iri nysandy júzege asyryp jatyrmyz. Máselen, «Telman» gaz jylý stantsııasynyń qurylysy júrip jatyr. Nysannyń jylý óndirý qýaty saǵatyna 620 Gkal bolady, ony bıyl iske qosý josparlanǵan.
Sondaı-aq, JEO-2-niń sý jylytatyn qazandyǵyn keńeıtý jáne rekonstrýktsııalaý jumysyn júrgizip, № 7 jáne № 8 sý jylytatyn qazandyqtardy ornatamyz. Bul jumys jylý qýatyn saǵatyna 360 Gkal-ǵa arttyrýǵa múmkindik beredi. Jańa jabdyqtardy kelesi jyly iske qosý josparlanyp otyr.
Sonymen qatar, bekitilgen bas josparǵa sáıkes, «Ońtústik-Shyǵys» jáne «Ońtústik-Batys» gaz jylý stantsııalaryn keńeıtý boıynsha jobalaý-izdestirý jumysyn júrgizip jatyrmyz. Eki nysannyń jalpy jylý óndirý qýaty saǵatyna 940 Gkal bolady.
Bul jobalardyń barlyǵy ınjenerlik ınfraqurylymnyń jylý óndirý qýatyn arttyryp, qajetti rezerv qalyptastyrýǵa ǵana emes, qalanyń tirshiligin qamtamasyz etý júıesiniń senimdiligin arttyrýǵa da múmkindik beredi, — dep jazdy qala ákimi.
Aıta ketelik Astanada 20-ǵa jýyq avtobýs baǵyty ózgergeni týraly jazǵan edik.
