Astanada jylytý maýsymy bastalǵannan beri 55 órt tirkelgen

ASTANA. KAZINFORM – Astana qalasy tótenshe jaǵdaılar departamenti memlekettik órt baqylaý basqarmasy basshysynyń orynbasary Ǵabıt Babaev turǵyn úıde bolyp jatqan órtterdiń negizgi sebepterin atady.

— Jyl basynan beri elordada 818 órt oqıǵasy tirkelgen. Onyń 327-si nemese 40 paıyzy turǵyn úı sektorynda bolǵan. Sonymen qatar 200-ge jýyq órt avtokólikte, 223 órt baqylaýdaǵy obektilerde oryn alǵan, - dedi ol óńirlik kommýnıkatsııalar qyzmetinde ótken baspasóz máslıhatynda.

Sondaı-aq qala turǵyndaryn órt qaýipsizdigin qatań saqtaýǵa shaqyrdy.

— Jylý berý maýsymy bastalǵannan beri turǵyn úı sektorynda 55 órt tirkeldi. Bul órtterdiń basty sebebi — pesh jaqqan kezde qaýipsizdik erejesin saqtamaý, Basqasha aıtsaq, pesh jaramsyz bolady nemese murjasy ýaqtyly tazalanbaıdy. Sonymen qatar elektr qurylǵylaryn durys paıdalanbaý, sapasyz jylytý aspaptaryn paıdalaný, elektr symdarynyń eskirýi, balalardy qaraýsyz qaldyrý jáne mas adamdardyń abaısyz áreketteri de órtke sebep bolyp jatyr, - dedi Ǵabıt Babaev.

Eske salsaq, eki kún buryn Astanadaǵy «Gamma» turǵyn úı kesheninen órt shyqqan bolatyn.