Astanada jyldamdyqty 80 retten astam asyrǵan júrgizýshi 15 táýlikke qamaldy
ASTANA. KAZINFORM – Astana qalasy ákimshilik quqyq buzýshylyqtar jónindegi mamandandyrylǵan aýdanaralyq soty jol qozǵalysy erejelerin birneshe márte óreskel buzǵan júrgizýshige qatysty ákimshilik is qarady.
Sot málimetinshe, azamat J. 2026 jylǵy naýryz-maýsym aılary aralyǵynda jol qozǵalysy erejelerin, onyń ishinde jyldamdyq rejımin buzǵany úshin 80 retten astam ákimshilik jaýaptylyqqa tartylǵan.
– Ákimshilik jaýaptylyqqa birneshe ret tartylǵanyna qaramastan, azamat J. óz áreketteriniń qoǵamdyq qaýiptiligin sezine otyryp, jol qozǵalysy erejelerin óreskel buzýdy jalǵastyrǵan. Ol eki jaǵdaıda kólik quralyn saǵatyna 151 km jáne 126 km jyldamdyqpen basqaryp, belgilengen jyldamdyqty edáýir asyrǵan, – delingen sot habarlamasynda.
Sot otyrysynda quqyq buzýshy kinásin tolyq moıyndap, jasaǵan áreketine ókinish bildirgen. Sondaı-aq jyldamdyqty birneshe ret asyrǵanyn jáne barlyq ákimshilik aıyppuldardy tólegenin rastaǵan.
Іs materıaldary boıynsha onyń kinási ákimshilik quqyq buzýshylyq týraly hattamamen, «Sergek» júıesiniń beınejazbalary jáne fotomaterıaldarymen, arnaıy esepke alý derekterimen, sondaı-aq Bas prokýratýranyń Quqyqtyq statıstıka jáne arnaıy esepke alý jónindegi komıtetiniń málimetterimen dáleldengen.
– Sot azamat J.-ny Ákimshilik quqyq buzýshylyq týraly kodekstiń 434-babynyń 1-bóligi boıynsha kináli dep tanyp, oǵan 15 táýlik merzimge ákimshilik qamaqqa alý jazasyn taǵaıyndady. Jaza taǵaıyndaý kezinde quqyq buzýshylyqtyń qoǵamdyq qaýiptiligi, jol qozǵalysyna qatysýshylardyń ómiri men densaýlyǵyna tóndirgen qaýip jáne júrgizýshiniń jyl basynan beri jyldamdyqty asyrǵany úshin 80 retten astam jaýapqa tartylǵany eskerildi, – dep málimdedi sot.
Aıta keteıik, Abaı oblysynda 172 júrgizýshige zańsyz salynǵan aıyppuldardyń kúshi joıyldy.
