Astanada jyl boıy kórkin saqtaıtyn «Tórt mezgil» gúlzary ashyldy
ASTANA. KAZINFORM — Elordanyń Nura aýdanynda 1 maýsym — Halyqaralyq balalardy qorǵaý kúnine oraı «Tórt mezgil» gúlzarynyń saltanatty ashylýy ótti. Bul týraly Astana qalasynyń ákimdigi málim etti.
Jobany uıymdastyrýshylardyń málimdeýinshe, jańa gúlzardyń basty ıdeıasy — jyl mezgiline qaramastan turǵyndardy qýantatyn, jyl boıy tartymdy jasyl aımaq qurý. Landshaft mamandary ósimdikterdi aýmaqtyń tórt mezgil boıy sándik tartymdylyǵyn, qanyq tústeri men estetıkalyq kelbetin saqtaıtyndaı etip muqııat iriktegen.
— Gúlzar aýmaǵynda jóke, qaraǵaı, shyrsha, emen, úıeńki jáne mamyrgúldi qosa alǵanda, 15-ten astam túrli sorttaǵy 400-den astam aǵash otyrǵyzyldy. Sonymen qatar, munda 20-ǵa jýyq túrdegi 14 myńnan astam buta egildi, olardyń arasynda tobylǵy, bóriqaraqat, arsha, sálben, shyǵys gúli jáne basqa da kóptegen ósimdikter bar, — delingen habarlamada.
Aǵashtar men butalardyń mundaı alýan túrliligi erte kóktemnen qysqa deıin tabıǵattyń reńki men kórkem kelbetiniń úzdiksiz ózgerip otyrýyna múmkindik beredi.
Qazirgi ýaqytta gúlzarda jaıaý júrginshiler joldary jabdyqtalyp, yńǵaıly zamanaýı átkenshekter men shahmat ústelderi ornatylǵan.
Taıaý kúnderi qosymsha oryndyqtar ornatýdy aıaqtaý josparlanyp otyr. Osylaısha, jańa keńistik shaǵyn aýdan turǵyndarynyń kúndelikti demalysyna arnalǵan fýnktsıonaldy orynǵa aınalady.
Gúlzardyń ashylýy erekshe atmosferada ótti. Aýdan balalary úshin belgili mýltfılm keıipkerleri beınesindegi anımatorlardyń qatysýymen oıyn-saýyq baǵdarlamasy uıymdastyryldy. Jas astanalyqtar úlken qýanyshpen túrli oıyndar men konkýrstarǵa qatysyp, súıikti keıipkerlerimen sýretke tústi, tátti syılyqtar men estelik kádesyılar aldy. Eresekter taza aýada ústel oıyndaryn oınap, kórshilerimen áńgime-dúken quryp, ýaqytyn belsendi ótkizdi.
«Tórt mezgil» gúlzary — turǵyndar taza aýada ýaqyt ótkize alatyn shaǵyn, biraq óte jaıly serýendeý aımaǵy.
Mundaı bastamalar qalalyq ortanyń jaılylyǵyn arttyryp, ekologııalyq ahýaldy jaqsartyp qana qoımaı, otbasylyq demalysqa qolaıly jaǵdaı jasaıdy.
Eske sala keteıik, jaqynda Astanada Ýrbanıstıka ortalyqtaryn qurý máselesi kóterilgenin jazǵan edik.
