Astanada jyl basynan beri jol erejesin 61 ret buzǵan júrgizýshi ustaldy
ASTANA. KAZINFORM — Astanada polıtsııa qyzmetkerleri jol qozǵalysy erejelerin uzaq ýaqyt boıy ádeıi jáne óreskel túrde buzyp kelgen júrgizýshiniń zańǵa qaıshy áreketterin toqtatty, dep habarlaıdy Polisia.kz.
Qaladaǵy reıd barysynda BMW avtokóligi toqtatyldy. Tekserý nátıjesinde 27 jastaǵy júrgizýshisiniń jyl basynan beri 61 ret ákimshilik jaýapkershilikke tartylǵany anyqtaldy. Onyń 59-y — belgilengen jyldamdyqty arttyrý faktileri.
Júrgizýshiniń áreketi qoǵamdyq qaýipsizdikke eleýli qater tóndirgen. Atap aıtqanda ol Ál-Farabı kóshesinde jaıaý júrginshiler ótkelinen 133 km/saǵ jyldamdyqpen qyzyl baǵdarshamǵa ótip ketken. Budan bólek, ruqsat etilgen 90 km/saǵ ornyna 216 km/saǵ jyldamdyqpen júrgeni de tirkelgen.
Mundaı jaýapsyzdyq pen zańdy elemeý — azamattardyń ómiri men densaýlyǵyna tikeleı qaýip tóndiretin áreket.
Qabyldanǵan sharalar nátıjesinde quqyq buzýshy usaq buzaqylyq jasaǵany úshin ákimshilik jaýapkershilikke tartylyp, 15 táýlikke ákimshilik qamaýǵa alyndy. Avtokólik kommýnaldyq turaqqa qoıyldy.
— Polıtsııa zań talaptaryn júıeli túrde elemeıtin tulǵalarǵa qatysty qatań ári qaǵıdatty sharalar qoldanylatynyn atap ótedi. Aıyppuldy tóleý faktisi jaýapkershilikten bosatpaıdy jáne zań aldynda barsha azamat teń. Astana qalasy polıtsııa departamenti turǵyndardy jol qozǵalysy erejelerin qatań saqtaýǵa shaqyrady. Kez kelgen óreskel ári qaıtalanatyn quqyq buzýshylyqtar zań aıasynda toqtatylyp, tıisti jaýapkershilikke ákep soǵady, — delingen aqparatta.
Eske sala keteıik, buǵan deıin QR Parlamenti Senatynyń depýtaty Marat Qojaev jol erejesin jıi buzatyndarǵa jazanyń basqa túrin qoldanýdy usynǵan edi.
