Astanada jyl basynan beri vandalızmge barǵan 160 adam jazalandy

ASTANA. KAZINFORM – Elordada vandalızm áreketteri men qoǵamdyq tártipti buzýshylyqtarǵa qarsy júıeli kúres júrgizilýde, dep habarlaıdy Astana ákimdiginiń resmı saıty.

Jaqynda Baıqońyr aýdanyndaǵy Ýálıhanov kóshesinde belgisiz adamdar aıaldama pavılonynyń terezesin syndyrǵan. Polıtsııa tekseris nátıjesinde 37 jastaǵy er adam anyqtaldy. Onyń mas kúıinde qala múlkin ádeıi búldirgeni belgili boldy. Sot sheshimimen quqyq buzýshy 10 táýlikke qamaýǵa alyndy.

Jalpy, 2025 jyldyń basynan beri 160 adam ákimshilik jaýapkershilikke tartyldy. Onyń ishinde 93 adam qamaýǵa alynyp, 67 azamatqa jalpy somasy 10,4 mln teńgeden astam aıyppul salyndy.

Zań boıynsha aıaldamalardy, oryndyqtardy, shaǵyn sáýlet nysandaryn jáne ózge de ınfraqurylym nysandaryn búldirgender ákimshilik jaýapkershilikke tartylady. Mundaı áreketter qalaǵa materıaldyq shyǵyn keltirýmen qatar, turǵyndardyń jaıly ómir súrýine kedergi jasaıdy.

Ótken jyldan beri elordada «Stop, vandal» aktsııasy ótkizilip keledi. Oǵan eriktiler, belsendiler, sportshylar men qala turǵyndary atsalysýda. Aktsııanyń maqsaty – vandalızmniń kez kelgen túrine jol bermeý jáne tazalyq pen tártipti saqtaý.

Qalalyq polıtsııa prokýratýramen birlese otyryp «Zań jáne tártip» qaǵıdaty aıasynda vandalızmge qarsy jumystardy jalǵastyrýda.

Eske salaıyq, bótenniń múlkin qasaqana joıý nemese búldirý 60 AEK-ke deıin aıyppulmen nemese 30 táýlikke deıin qamaýmen jazalanady.

Aıta keteıik, buǵan deıin Astanada vandalızmge qarsy reıd bastalǵany habarlandy.