Astanada jyl basynan beri iKOMEK109 ortalyǵyna 2 mln-nan asa ótinish tústi
ASTANA. KAZINFORM — Bıyl jyl basynan beri iKOMEK109 qalalyq monıtorıng jáne jedel áreket etý ortalyǵyna 2 mln 78 myńnan astam ótinish tústi, dep habarlaıdy Astana ákimdiginiń resmı saıty.
Qazirgi ýaqytta iKOMEK109 ortalyǵyna 23 qalalyq basqarma, 6 aýdandyq ákimdik, 25 kommýnaldyq qyzmet, 79 lıft sharýashylyǵy jáne 1 372 turǵyn úıdi basqarýshy uıym biriktirilgen.
Birinshi kezektegi mindet — turǵyndardyń ótinishterin qashyqtan jedel ári tıimdi sheshý. Azamattardyń yńǵaılylyǵy úshin omnıkanaldy qyzmet qaǵıdaty engizilgen. Bul ótinish berýshilerge túrli arnalar arqyly suranys joldap, onyń mártebesin baqylaýǵa múmkindik beredi. Búginde ótinishterdiń 21 paıyzy balamaly tsıfrlyq servıster arqyly qabyldanady. Qysqa nómir — 1-0-9-dan bólek, iKOMEK109 Biryńǵaı baılanys ortalyǵyna júginýdiń taǵy 6 tásili bar: Telegram-bot, ákimdik saıty astana.gov.kz, iKOMEK109 mobıldi qosymshasy, Facebook jáne Instagram áleýmettik jelilerindegi resmı paraqshalar, sondaı-aq 109@ikomekastana.kz elektrondyq poshtasy.
iKOMEK júıesine qala aýmaǵyndaǵy 12 myńnan astam beınebaqylaý kamerasy qosylǵan. Olardyń qatarynda balabaqshalar, mektepter, emhanalar jáne basqa da nysandar bar. Negizinen kameralar jol bóligin, qıylystardy, halyq kóp jınalatyn oryndardy — saýda ortalyqtaryn, meshitterdi, iri avtobýs aıaldamalaryn, vokzaldardy qamtıdy.
Sonymen qatar ortalyq operatorlary maýsymdyq monıtorıng aıasynda qardyń ýaqytyly tazalanbaýy, kóktemgi sý tasqyny men jańbyr kezindegi sý jınalý jaǵdaılary, ashyq qudyqtar jáne basqa da kommýnaldyq salaǵa qatysty problemalardy anyqtaıdy. Mundaı derekter qalalyq kommýnaldyq qyzmettermen jedel túrde pysyqtalady.
Qaýipsizdikti ortalyqtandyrylǵan baqylaý jáne tıimdi úılestirý úshin iKOMEK-ke Astana qalasy Polıtsııa departamentiniń qyzmetkerleri de tartylǵan. Olarmen birlesip 2025 jyldyń basynan beri 21 277 quqyqbuzýshylyq anyqtaldy. Onyń ishinde:
• 615-bap (jaıaý júrginshiler men jol qozǵalysyna qatysýshylardyń qozǵalys erejesin buzýy) — 3 617 jaǵdaı;
• 440-bap (qoǵamdyq oryndarda alkogol ishý nemese mas kúıinde bolý) — 308;
• 505-bap (kóriktendirý erejelerin buzý) — 415;
• 204-bap (belgilenbegen jerde saýda jasaý) — 24 jaǵdaı.
Osyǵan deıin Astananyń bilim berý uıymdarynda býllıngtiń aldyn alý sharalary kúsheıtilgenin jazǵanbyz.