Astanada jyl basynan beri 80-ge jýyq vandalızm deregi tirkeldi
ASTANA. KAZINFORM — Elordada 80-ge jýyq múlikti búldirý faktisi anyqtaldy. Bul týraly qalalyq Polıtsııa departamenti málim etti.
Vedomstvonyń málimetinshe, elordada qoǵamdyq oryndardy baqylaýǵa arnalǵan beınebaqylaý júıesi úzdiksiz jumys isteıdi. Aıaldama pavılondaryndaǵy kameralardyń basym bóligi Jedel basqarý ortalyǵyna qosylǵan. Sondaı-aq quqyq qorǵaý organdary turǵyndarmen túsindirý jumystaryn júrgizip, daýys zoraıtqyshtar men drondardy paıdalanady.
Kóbine aıaldama pavılondary, oryndyqtar, qoqys jáshikteri, jarnama qurylymdary, turǵyn úılerdegi beınebaqylaý kameralary men lıft jabdyqtary búlinedi.
Bıyl birneshe jaǵdaıda vandaldar aıaldama pavılondarynyń esikterin syndyryp, oryndyqtary men rozetkalaryn búldirip, shynylaryn syndyrǵan. Tártip buzýshylar anyqtalyp, jaýapkershilikke tartyldy. Keıbirine ákimshilik qamaý jazasy qoldanylǵan.
Polıtsııanyń habarlaýynsha, mundaı quqyq buzýshylyqtarǵa kámeletke tolmaǵandar da jıi barady. Máselen, toǵyz jasar balanyń shlagbaýmdy syndyryp ketken faktisi tirkelgen. Keıin onyń ata-anasy anyqtalyp, keltirilgen shyǵyndy óteýge mindetteldi.
Quqyq qorǵaý organdary bótenniń múlkin qasaqana búldirgeni úshin zańda jaýapkershilik kózdelgenin eske saldy. Tártip buzýshylar keltirilgen shyǵyndy ótep, aıyppul tóleýi nemese ákimshilik qamaýǵa alynýy múmkin.
Polıtsııa turǵyndardy vandalızm faktilerine beıjaı qaramaýǵa shaqyryp, mundaı jaǵdaılar baıqalǵan kezde «102» nómirine habarlaýdy surady.
Budan buryn Oljas Bektenov vandalızmge qarsy baqylaýdy kúsheıtýdi tapsyrǵanyn jazǵanbyz.
