Astanada jyl basynan beri 7 bala terezeden qulap, mert boldy
ASTANA. KAZINFORM — Bul týraly qalalyq Ortalyq kommýnıkatsııalar qyzmetinde ótken baspasóz májilisinde Astana qalasy Tótenshe jaǵdaılar departamenti Tótenshe jaǵdaılardyń aldyn alý basqarmasy bastyǵynyń mindetin atqarýshy Álı Arǵynbaev málim etti.
Onyń aıtýynsha, jyl basynan beri «112» qutqarý qyzmetiniń pýltine balalardyń terezeden qulaýy boıynsha 26 habarlama túsken.
— Elordada jyl basynan beri balalardyń terezeden qulaýyna qatysty 26 oqıǵa tirkelip, saldarynan 7 bala qaza boldy. Zardap shekkenderdiń basym bóligi — 2 men 7 jas aralyǵyndaǵy balalar. Ótken jyldyń uqsas kezeńimen salystyrǵanda mundaı oqıǵalar sany azaıǵanymen, másele ózektiligin joǵaltqan joq, — dedi Álı Arǵynbaev.
Spıkerdiń málimetinshe, balalardyń terezeden qulaýynyń aldyn alý maqsatynda qalada turaqty túrde profılaktıkalyq jumystar júrgizilip keledi.
— 2026 jyldyń naýryz aıynan bastap Tótenshe jaǵdaılar departamentiniń qyzmetkerleri múddeli qyzmettermen birlesip 2,5 myńnan astam kópqabatty turǵyn úıdi aralap shyqqan. Turǵyndarǵa shamamen 11 myń jadynama taratylyp, 12 myńnan astam adammen túsindirý jumystary júrgizilgen. Sondaı-aq ıývenaldy polıtsııa jáne volonterlik uıymdarmen birlesip uıymdastyrylǵan «Qaýipsiz tereze» aktsııasy aıasynda kópbalaly jáne kishkentaı balalary bar otbasylardyń páterlerine 1 028 tereze qulpy-blokıratory tegin ornatyldy, — dedi spıker.
Budan bólek, qaladaǵy 53 mektep pen 35 balabaqshada profılaktıkalyq dárister ótkizilgen.
— Aqparattyq materıaldar ata-analar chattary, MIB jáne PIK arqyly taratylyp jatyr. Qoǵamdyq oryndarda taqyryptyq beınerolıkter kórsetilip, turǵyn úılerdiń kireberisteri men lıftilerinde balalar qaýipsizdigi jónindegi materıaldarǵa baǵyttaıtyn QR-kody bar jadynamalar ornalastyryldy, — dep atap ótti Álı Arǵynbaev.
Sóz sońynda TJD ókili ata-analardy balalardy qaraýsyz qaldyrmaýǵa shaqyrdy.
— Kishkentaı balalardy qaraýsyz qaldyrmaý, olardyń tereze aldyna shyǵýyna jol bermeý, tereze mańyndaǵy jıhazdardy alyp tastaý qajet. Sondaı-aq balalarǵa arnalǵan qulyptardy ornatyp, masaǵa qarsy torlarǵa senbeý kerek. Balalarǵa qaýipsizdik sharalaryn únemi túsindiri otyrǵan jón, — dep túıindedi sózin ol.
Eske salaıyq, buǵan deıin Bas prokýratýra balalardyń terezeden qulaýyna baılanysty turǵyndarǵa eskertý jasady.
