Astanada jyl basynan beri 529 órt bolǵan: negizgi sebepteri ataldy
ASTANA. KAZINFORM — Astana aýmaǵynda jyl basynan beri 529 órt tirkeldi. Onyń ishinde 225 órt nemese jalpy sannyń 42,5%-y turǵyn úı sektorynda bolǵan. Sonymen qatar, avtokólik quraldarynda shamamen 135 órt, baqylaýdaǵy obektilerde taǵy 125 órt tirkeldi. Bul týraly Astana qalasynyń ákimdigi málim etti.
Elordanyń Kommýnıkatsııalar qyzmetinde ótken brıfıngte Astana qalasy Tótenshe jaǵdaılar departamenti Memlekettik órt baqylaý basqarmasy bastyǵynyń orynbasary Ǵabıt Babaev órttiń negizgi sebepterin atady:
- Peshti jylytý kezinde órt qaýipsizdigi talaptaryn buzý, onyń ishinde peshterdiń durys jumys istemeýi jáne tútin murjalaryn ýaqtyly tazalamaý;
- Azamattardyń órt qaýipsizdigi sharalaryn saqtaýǵa nemquraıly jáne salǵyrt qaraýy;
- Elektr aspaptaryn durys paıdalanbaý jáne sapasyz jylytý qurylǵylaryn paıdalaný;
- Elektr symdarynyń tozýy, sondaı-aq ruqsat etilmegen qosylystardy paıdalaný;
- Balalardy qaraýsyz qaldyrý jáne balalardyń otpen oınaýy;
- Alkogolge mas kúıindegi azamattardyń otqa abaısyzdyqpen qaraýy.
— Astana qalasynda halyqtyń áleýmettik osal sanattaryna jatatyn 983 otbasy, onyń ishinde az qamtylǵan jáne áleýmettik beıimdelmegen otbasylar esepte tur. Jergilikti atqarýshy organdarmen, polıtsııa qyzmetkerlerimen jáne eriktilermen birlesip profılaktıkalyq reıdtik is-sharalar júrgiziledi, — deıdi ol.
Júrgizilgen reıdter barysynda:
- 157 jeke turǵyn úı zertteldi;
- 700-ge jýyq azamatqa órt qaýipsizdigi talaptary men qaǵıdalary túsindirildi;
- Órt qaýipsizdigi talaptarynyń 38-ge jýyq buzylýy anyqtaldy, onyń 15,8%-y jylytý júıelerimen, al 84,2%-y elektr jelilerimen baılanysty;
- 30 buzýshylyq tikeleı sol jerde joıyldy.
Budan basqa, halyqtyń áleýmettik osal sanattaryna jatatyn azamattardyń turǵyn úılerinde 12 ýly gaz datchıgi ornatylǵan. Sońǵy tórt jylda profılaktıkalyq jumys aıasynda 3000-nan astam osyndaı datchıkter ornatyldy.
Elordadaǵy aýa temperatýrasynyń kúrt tómendeýine baılanysty Astana qalasynyń Tótenshe jaǵdaılar departamenti azamattardy turǵyn úı jaılardy jylytý kezinde órt qaýipsizdigi sharalaryn qatań saqtaýǵa shaqyrdy:
- Peshtiń, elektr jáne gaz jylytqyshtarynyń jaramdylyǵyn tekserińiz;
- Tek jaramdy jylytý qurylǵylaryn paıdalanyńyz;
- Jabdyqtyń qyzyp ketýine jol bermeńiz jáne elektr qurylǵylaryn qaraýsyz qaldyrmańyz;
- Murjalardy kúıeden únemi tazalańyz;
- Úıde jasalǵan nemese aqaýly jylytý qurylǵylaryn paıdalanbańyz;
- Órt bolǵan jaǵdaıda dereý 101 nemese 112 nómirleri boıynsha habarlańyz;
- Balalardy qaraýsyz qaldyrmańyz, olardyń qaýipsizdigi árqaısymyzdyń ortaq jaýapkershiligimiz.
— Esińizde bolsyn, órt qaýipsizdiginiń qarapaıym qaǵıdalaryn saqtaý ómirdi, densaýlyqty jáne múlikti saqtaýǵa kómektesedi. Árbir azamattyń qaýipsizdik máselelerine jaýapkershilikpen qaraýy — órtterdiń jáne olardyń qaıǵyly saldaryn aldyn alýdyń kepili, — deıdi Ǵabıt Babaev.
Keshe Qazaqstanda bir táýlikte eki orman órti tirkeldi.
