Astanada jyl basynan beri 25 bala terezeden qulaǵan
ASTANA. KAZINFORM — Astanada jyl basynan beri balalardyń terezeden qulaýyna baılanysty 25 oqıǵa tirkeldi. Al respýblıka boıynsha dál osyndaı 47 oqıǵa bolǵan.
Bul týraly Jibek Joly telearnasynyń «Búgin LIVE» baǵdarlamasynda Astana qalasy TJD Tótenshe jaǵdaılardyń aldyn alý basqarmasynyń ınjeneri Álı Arǵynbaev habarlady.
– Astana qalasy boıynsha jyl basynan beri 25 oqıǵa tirkeldi. Al Qazaqstan boıynsha bul kórsetkish – 47. Oqıǵalardyń jartysynan kóbi elordada bolyp otyr. Ókinishke qaraı, 7 bala kóz jumdy. Ótken jyly 58 oqıǵa tirkelip, 14 bala qaza bolǵan edi, – dedi Álı Arǵynbaev.
Onyń málimetinshe, bıyl terezeden qulaý saldarynan 18 bala aýyr jaraqat alyp, aýrýhanaǵa jetkizilgen. Oqıǵalardyń basym bóligi 2-6 jas aralyǵyndaǵy balalardyń qatysýymen bolǵan.
Maman mundaı jaǵdaılardyń negizgi sebebi – balalardyń ata-ananyń qaraýynsyz qalýy ekenin atap ótti.
– Kóp jaǵdaıda ata-analar masaǵa qarsy torlardyń qaýipsizdigine senedi. Alaıda balalar terezege jaqyndap, syrtqa qaraýǵa umtylǵan kezde torǵa súıenip, onymen birge jıi qulap ketip jatady, – dedi ol.
Osyǵan baılanysty TJD ókili ata-analardy qaýipsizdik talaptaryn qatań saqtaýǵa shaqyrdy. Onyń aıtýynsha, balalardy úıde jalǵyz qaldyrmaý, tereze aldyna oryndyq pen ústel sekildi jıhazdardy qoımaý jáne terezelerge arnaıy blokıratorlar ornatý qajet.
– Qaýipsizdik erejelerindegi basty qaǵıda – balany eshqashan jalǵyz qaldyrmaý. Sondaı-aq tereze aldyna oryndyq nemese ústel qoıýǵa bolmaıdy. Olar bala úshin satynyń qyzmetin atqarady. Budan bólek, terezelerge arnaıy blokıratorlar ornatý mańyzdy, – dedi Álı Arǵynbaev.
Aıta keteıik, terezeden qulaǵan balalardyń kóbi – bes jasqa deıingiler.
