Astanada jyl basynan beri 4 jeke sot oryndaýshysy lıtsenzııasynan aıyryldy
ASTANA. KAZINFORM – 2026 jyldyń basynan beri Astana qalasynyń Ádilet departamenti jeke sot oryndaýshylarynyń qyzmetine qatysty 166 josparly jáne 124 jospardan tys tekserý júrgizdi. Bul týraly elordalyq Kommýnıkatsııalar qyzmetinde ótken brıfıngte Astana qalasy Ádilet departamenti basshysynyń orynbasary Móldir Esenqulova málim etti.
Onyń aıtýynsha, departament óz ókilettigi sheginde jeke sot oryndaýshylarynyń jumysyn turaqty qadaǵalap otyrady.
– Zań talaptaryn buzǵan sot oryndaýshylaryna qatysty tıisti sharalar qabyldandy. Departamenttiń usynysy negizinde jyl basynan beri tórt jeke sot oryndaýshysy lıtsenzııasynan aıyryldy. Baqylaý júrgizýdegi basty maqsat – JSO-lardy jazalaý emes, olardyń jumysyndaǵy zańbuzýshylyqtardyń aldyn alý, turǵyndardyń quqyǵyn qorǵaý jáne sot sheshimderiniń múltiksiz oryndalýyn qamtamasyz etý, – dedi Móldir Esenqulova.
Sondaı-aq Astana qalasy Ádilet departamenti Sot oryndaýshylarynyń qyzmetin retteý jáne baqylaý bóliminiń basshysy Aıdana Bekberdi baqylaý barysynda atqarýshylyq áreketterdiń merzimine, májbúrlep oryndatýdyń sapasyna, sondaı-aq boryshkerlerdiń múlki men aqshalaı qarajatyn anyqtaýǵa basymdyq beriletinin atap ótti.
Onyń aıtýynsha, baqylaý jumystary tek aryz-shaǵymdar boıynsha ǵana emes, júıeli túrde júrgiziledi. Kandaı da bir buzýshylyq tirkelse, onyń sıpaty men iske qatysýshy taraptardyń quqyǵyna tıgizgen áseri baǵalanyp, tıisti quqyqtyq sharalar kóriledi.
Aıta keteıik, buǵan deıin, Almaty oblysynda jeke sot oryndaýshylary qumar oıyndarǵa 180 mln teńge qarjy jumsaǵanyn jazǵan edik.
