Astanada «Jibek joly ekonomıkalyq beldeý» atty Qytaı sýretshileriniń kórmesi ótip jatyr

Kórmege Qytaı memleketiniń tanymal sýretshileri Gýan Honchen men Shao Pýdyń sýretteri qoıylǵan. «Kórmeniń maqsaty - eki eldiń mádenı baılanystaryn nyǵaıtý, sýretshilerdiń  ózara tájirıbe almasýyna muryndyq bolý. Ótken jyldary Qytaıda Qazaqstandyq sýretshilerdiń kórmesin ótkizgenbiz», deıdi sharany uıymdastyrýshy «Murat joly» mádenıet qoǵamdyq birlestiginiń tóraǵasy Dýman Amanuly.Osy shara barysynda ózge de birneshe qylqalam sheberleriniń pikirin bilgen edik.

  

Astana Sýretshiler odaǵynyń tóraǵasy Ermekov Tohtar: «Qytaıdyń álemge áıgili eki sýretshisi kelipti. Bizdiń sýretshilerimiz de Qytaıǵa jıi baryp, kórmelerin ótkizip  turady. Qytaılyq sýretshilerdiń sýret salý stıli, kózqarasy, berilýi  múlde basqasha.  Bul sýretshilerdiń maıtalman sheberler ekeni kórinip tur. Olarda sýretshiler ár salaǵa bólinedi eken, bir sýretshiler tek qana gúldi salady, taǵy bireýleri tek jylqynyń, jan- janýardyń sýretin salady. Al biz ámbebappyz, barlyǵyn sala beremiz, múmkin sodan da bolar, bir salanyń naǵyz tereńdigine jete almaımyz. Estýimizshe, Qytaı elinde 15 mıllıondaı sýretshi bar eken. Bizdiń sýretshilerdiń sany nebári 1000-nan astam. Ol jaqta memleket tarapynan da sýretshilerge qoldaý kóp, sonymen birge sýretteriniń bazardaǵy baǵasy da qundy. Sondyqtan da bizdiń sýretshilerdiń jaǵdaıy qytaılyq sýretshilermen salystyrǵanda óte tómen. Jeke shyǵarmashylyǵyn damytýdyń ornyna ár jerde oqýshylarǵa sabaq berip, kún kórýge májbúr.  Jeke sýretter salyp, tabysqa jetken sýretshiler sanaýly ǵana.

 

Shao Pý qytaılyq sýretshi: Qazaqstandyq sýretshiler realızm baǵyty boıynsha damyp keledi. Bul dástúrli baǵyt bolyp sanalady. Osy baǵytqa barynsha basymdylyq beriletindigi seziledi. Qazaqstannyń mýzeılerinde boldym. Sondaǵy sýretshilerdiń  jumystarynan qazaqtyń salt-dástúrin, etnografııasyn, sonymen birge 21 ǵasyrdyń aıasyndaǵy búgingi ómirdiń ajaryn beıneleýde úlken izdenister bar ekendigin  baıqaýǵa bolady. Bunyń bári Qazaqstannyń dástúrli mádenıetiniń jalǵasy,  sonymen birge álemdik deńgeıdegi jańa stılderge baǵyt alý dep bilemin.

Qytaıda  úlken shyǵarmashylyq keńistik, shyǵarmashylyq múmkindikter mol. Elimizde orta eseppen 15 mıllıonnan astam sýretshiler bar. Naqty Sýretshiler odaǵyna tirkelgenderi 10 myńnan joǵary.  Qazir Qytaıdaǵy sýretshileri úlken daǵdarys kezeńinde tur. Sýretshilerimizdiń bir toby dástúrli joldan bólinip, óz aldyna bólek soqpaq izdeýde. Sol arqyly elimizdegi jáne álemdik naryqqa shyǵýdyń joldaryn qarastyryp  jatyr.

 

 Qazaqstannyń eńbek sińirgen qaıratkeri, sýretshi Kamıl Mýllashev: Qytaıda  birneshe ret jeke sýret kórmemdi ótkizdim. Kóptegen halyqaralyq kórmelerge qatystym. Qytaı úlken el, olardyń sýretteriniń ereksheligi - Go hýa degen dástúrli ádisin ustanady. Olardyń mektebiniń biliktiligi joǵary. Sýretshilerge erkindik berilgen. Beıjińde arnaıy sýretshiler qalashyǵy bar ekenin  baıqadym, onda júzdegen galereıalar bar. Sondaı-aq ártúrli stılge erkindik berilgen. Kóptegen mýzeıleri, kórme zaldary udaıy ashyq turady. Biz de naryqtyq jolmen alǵa jyljyp kelemiz.  Ár sýretshi óz múmkindigi men qolóneriniń sheberligine qaraı naryqqa shyǵýda. Maıly boıaýmen sýret salýda qazaqstandyq sýretshilerdiń deńgeıi joǵary.