Astanada jıhaz daıyndaýǵa tapsyrys qabyldaǵan eki alaıaq 19 adamdy aldaǵan
ASTANA. KAZINFORM — Astanada tapsyryspen jıhaz daıyndaýǵa qatysty alaıaqtyq shema áshkerelendi. Bul týraly qala prokýratýrasy málimdedi.
Іs materıaldaryna sáıkes, jábirlenýshilerdiń biri Instagram jelisinen jıhaz daıyndaý týraly jarnamany kórip, kúdiktilermen kelisim jasaǵan. Úıine ólshem aldyrǵannan keıin ol 4,5 mln teńge aýdarǵan. Alaıda sodan keıin kúdiktiler onymen baılanysyn úzgen.
Tergeý barysynda olardyń áreketinen 19 azamat zardap shekkeni anyqtaldy. Keltirilgen zalaldyń jalpy somasy 24,6 mln teńgeden asqan.
Sotta memlekettik aıyptaýshy eki sottalýshynyń kinásin dáleldeıtin barlyq qajetti dálelderdi usyndy.
— Sot úkimimen olardyń árqaısysy 6 jylǵa bas bostandyǵynan aıyryldy. Sonymen qatar olar 10 jyl boıy kommertsııalyq jáne kommertsııalyq emes uıymdarda basshylyq qyzmet atqarý quqyǵynan aıyryldy. Jábirlenýshilerdiń azamattyq talap-aryzdary tolyq qanaǵattandyryldy. Keltirilgen zalal sottalýshylardan óndirip alynatyn bolady, — delingen shyǵarylǵan úkimde.
Prokýratýra azamattardy jıhaz daıyndaýǵa tapsyrys bergen kezde saq bolýǵa shaqyrdy. Aqshany qolma-qol nemese jazbasha shartsyz jeke bank kartasyna aýdarmaý, tólemdi rastaıtyn chek pen qujattardy talap etý usynylady.
Sondaı-aq shartta jıhazdyń ólshemderi men qoldanylatyn materıaldar, baǵasy, daıyndaý jáne ornatý merzimderi, sondaı-aq mindettemelerdi oryndaý merzimi buzylǵan jaǵdaıda taraptardyń jaýapkershiligi naqty kórsetilýi qajet.
Osyǵan deıin BQO turǵyny jaǵymsyz ısi bar jıhaz úshin satýshydan 2,6 mln teńge óndirip alǵanyn jazǵan edik.
