Astanada JI kómegimen dıagnoz qoıý ýaqyty 10 mınýtqa deıin qysqardy
ASTANA. KAZINFORM — Elordanyń densaýlyq saqtaý júıesine dıagnostıka dáldigi men jedeldigin arttyrýǵa, dárigerlerdiń júktemesin azaıtýǵa baǵyttalǵan jasandy ıntellekt negizindegi birqatar sheshim engizildi, dep habarlaıdy Astana ákimdiginiń resmı saıty.
Mańyzdy jobalardyń biri — WDSOFT jasandy ıntellekt júıesin qoldana otyryp, radıologııalyq zertteýlerdi ortalyqtandyrý. Joba onkologııalyq aýrýlarmen kúresýdiń keshendi jospary aıasynda júzege asyryldy. Qazir júıege vedomstvolyq baǵynysty 19 medıtsınalyq uıym qosylǵan.
WDSOFT júıesin paıdalaný onkologııalyq aýrýlardy erte kezeńde anyqtaýǵa, medıtsınalyq keskinderdegi patologııalyq ózgeristerdi joǵary dáldikpen tanýǵa jáne dıagnoz qoıý ýaqytyn 10 mınýtqa deıin qysqartýǵa múmkindik beredi. Sonymen qatar júıe dáriger-rentgenologterdiń júktemesin azaıtyp, medıtsınalyq kómektiń sapasyn arttyrýǵa yqpal etedi.
2025 jylǵy 1 tamyzdan beri Astananyń biryńǵaı ortalyq gúlzarynda 360 myńnan astam radıologııalyq zertteý jınaqtalǵan. Onyń ishinde:
• 282 603 rentgen jáne flıýorografııalyq zertteý;
• 44 215 kompıýterlik tomografııa;
• 3 878 magnıttik-rezonanstyq tomografııa;
• 28 618 mammografııalyq zertteý;
• 949 angıografııalyq zertteý.
Tsıfrlyq medıtsınadaǵy taǵy bir ozyq sheshim — ınsýltti avtomatty dıagnostıkalaýǵa arnalǵan Cerebra.ai Ltd. kompanııasynyń Cerebra baǵdarlamalyq jasaqtamasyn engizý.
Júıe dıagnozdy jyldam ári dál qoıýǵa, ınsýlttiń túri men qosalqy túrin naqty jikteýge múmkindik beredi. Sondaı-aq ýaqyttyń ár mınýty mańyzdy bolatyn jaǵdaıda dárigerlerge sheshim qabyldaýǵa kómektesedi.
Joba Astana qalasynyń № 2 qalalyq kópbeıindi aýrýhanasynda sátti pılottyq synaqtan ótkennen keıin Cerebra júıesin elordanyń úsh ınsýlt ortalyǵyna — № 2 QKA, № 1 kópbeıindi qalalyq aýrýhanaǵa jáne Kópbeıindi medıtsınalyq ortalyqqa engizý týraly sheshim qabyldandy.
Elordadaǵy tsıfrlyq densaýlyq saqtaýdy damytýdyń kelesi kezeńi — «Jeke súıemeldeý jáne onlaın-konsýltatsııalar ortalyǵy» jobasy. Ony bıyl iske qosý josparlanyp otyr.
Ortalyqtyń jumysy medıtsınalyq uıymdardyń patsıenttermen ózara baılanysyn kúsheıtýge, halyqty profılaktıkalyq is-sharalarmen qamtýdy keńeıtýge, sondaı-aq medıtsınalyq kómektiń sapasy men onyń naqty qajettilikke saı kórsetilýin arttyrýǵa múmkindik beredi.
Sonymen qatar ortalyq bazasynda Astananyń densaýlyq saqtaý júıesindegi negizgi kórsetkishterdi jasandy ıntellekt tehnologııalary arqyly baqylaýǵa arnalǵan ahýaldyq ortalyq jumys isteıtin bolady.
Aıta keteıik, dárigerge júginbeı-aq jasandy ıntellektpen «keńesip», óz-ózin emdeýge tyrysatyn qazaqstandyqtardyń sany artyp keledi. Osyǵan baılanysty Kazinform tilshisi jańa tehnologııanyń medıtsına men qoǵam ómirine dendeý úderisin saralady.
