Astanada JI kameralary qaýipsizdik beldigi men telefon qoldanýdy anyqtaıdy
ASTANA. KAZINFORM – Elordada Astana Smart City jobasy aıasynda jol qozǵalysy erejelerin buzýdy tirkeıtin jasandy ıntellektige negizdelgen beıneanalıtıka júıesiniń jańa fýnktsıonaly engizilýde.
Jasandy ıntellekt jáne tsıfrlyq damý mınıstrliginiń málimetinshe, jańa algorıtmder júrgizýshilerdiń qaýipsizdik beldigin taqpaýy, kólik júrgizý kezinde telefon qoldanýy sııaqty quqyqbuzýshylyqtardy avtomatty túrde anyqtaýǵa múmkindik beredi. Qazirgi ýaqytta júıe testilik rejımde jumys istep tur.
– Jańa AI-beıneanalıtıka algorıtmderi jol qozǵalysy erejelerin buzýdyń keń aýqymyn avtomatty túrde anyqtaýǵa múmkindik beredi. Olardyń ishinde júrgizýshiniń kólik júrgizý kezinde telefon qoldanýy, qaýipsizdik beldigin taqpaýy jáne jol qaýipsizdigine áser etetin ózge de jaǵdaılar bar. Sheshimder kompıýterlik kórý jáne mashınalyq oqytý tehnologııalaryna negizdelgen, bul taldaýdyń joǵary dáldigin jáne jedeldigin qamtamasyz etedi, – delingen mınıstrlik málimetinde.
Júıe jekelegen quqyqbuzýshylyqtardy tirkeýmen ǵana shektelmeı, qalalyq jáne memlekettik aqparattyq júıelermen biriktirilgen biryńǵaı tsıfrlyq platformanyń bir bóligi bolyp tabylady. Bul jol jaǵdaıyn keshendi baǵalap, kólik aǵynyn tıimdi basqarýǵa múmkindik beredi.
– AI-kameralar biryńǵaı tsıfrlyq ınfraqurylymǵa biriktirilip, joldaǵy ahýaldy jan-jaqty taldaýǵa jáne kólik qozǵalysyn ońtaılandyrýǵa jaǵdaı jasaıdy. Joba aıasynda aqparattyq qaýipsizdik talaptarynyń saqtalýy qamtamasyz etilip, júıe kezeń-kezeńimen engizilýde, – dep atap ótilgen.
Jańa tehnologııalar jol-kólik oqıǵalaryn azaıtýǵa, júrgizýshilerdiń tártibin arttyrýǵa jáne qala turǵyndary úshin qaýipsiz orta qalyptastyrýǵa baǵyttalǵan.
Aıta keteıik, Astanada qoǵamdyq qaýipsizdik 36 myńnan astam beınekameramen baqylanady.
