Astanada jezóksheler jalǵa alǵan páterdiń ıesi jazaǵa tartyldy
ASTANA. QazAqparat - Astana qalasy Esil aýdandyq ishki ister departamentiniń jergilikti polıtsııa qyzmeti jezókshelik úshin jalǵa berilgen páterdi anyqtap, úıdiń ıesin sotqa berdi, dep habarlaıdy QazAqparat tilshisi.
Sot otyrysynda B. esimdi áıel óz páterin turmystaǵy kelinshekke jalǵa bergenin jetkizip, «onyń jezókshelikpen aınalysqanyn bilmedim» dep aqtaldy. Al úıdi jalǵa alǵan kelinshek osy sanattaǵy quqyq buzýshylyq úshin bir ret emes, eki ret jaýapqa tartylǵan.
«Astana qalasy boıynsha aýdanaralyq ákimshilik mamandyrylǵan sotynyń qaýlysyna sáıkes, B. esimdi áıel Ákimshilik quqyq buzýshylyq týraly kodeksiniń 450-baby, 2-tarmaǵy boıynsha kináli dep tanylyp, 200 aılyq eseptik kórsetkish (1 AEK - 2 405 teńge) kóleminde aıyppul tóleýge mindetteldi. Onyń qyzmeti 10 kúnge toqtatyldy. Ákimshilik quqyq buzýshylyq týraly kodeksiniń 819-baby, 2-tarmaǵy negizinde ákimshilik aıyppuldyń kólemi 30 paıyzǵa (shamamen 321 000 teńgege deıin - avt.) qysqartyldy. Sot sheshimi kúshine endi», - delingen sottyń resmı habarlamasynda.
