Astanada jetim balalarǵa arnalǵan páterlerdi jalǵan qujatpen ıemdenbek bolǵandar ustaldy
ASTANA. KAZINFORM — Qarjylyq monıtorıng agenttigi Bas prokýratýranyń úılestirýimen úlestik qurylysqa qatysý týraly jalǵan sharttar arqyly páterlerdi zańsyz ıemdený deregi boıynsha qylmystyq isti tergeýdi aıaqtady.
Tergeý málimetterine sáıkes, «Tólendi» turǵyn úı-qurylys kooperatıvin basqarǵan A. Baıjumanov 1,5 myń úleskerdiń 10 mlrd teńgesin jymqyrýdyń qylmystyq jolyn uıymdastyrǵan. Osy qylmysy úshin ol 2016 jyly 8 jylǵa bas bostandyǵynan aıyrylǵan.
Keıin Astana qalasy ákimdiginiń qatysýymen turǵyn úılerdiń qurylysy aıaqtalǵan. Páterlerdiń bir bóligi kópbalaly otbasylarǵa, jetim balalarǵa, múgedektigi bar adamdarǵa jáne áleýmettik jaǵynan osal toptaǵy ózge de azamattarǵa berilýge tıis bolǵan. Bas bostandyǵynan aıyrý oryndarynan bosap shyqqannan keıin A. Baıjumanov sybaılastarymen birge atalǵan páterlerdi ıemdenýdiń jańa aılasyn oılastyrǵan.
— Ol úshin shyn máninde úlesker bolmaǵan jáne páter satyp almaǵan azamattardyń atyna kooperatıvke jarna tóleý týraly jalǵan sharttar jasalyp, qujattar ótken kúnmen rásimdelgen. Osy jalǵan úleskerlerdiń atynan quqyq qorǵaý organdaryna alaıaqtyq jasalǵany týraly aryzdar berilgen. Sol aryzdardyń negizinde qylmystyq ister qozǵalyp, jalǵan úleskerler jábirlenýshi dep tanylǵan. Qylmystyq top sot sheshimderin paıdalanyp, páterlerdi óz attaryna rásimdeýdi, keıin olardy ózge adamdarǵa satyp, túsken aqshany ózara bólisýdi kózdegen, — delingen Qarjylyq monıtorıng agenttigi taratqan habarlamada.
Tergeý barysynda qylmystyq áreketke 80-nen astam jalǵan úleskerdiń tartylǵany anyqtaldy. Olardyń atyna 170 jyljymaıtyn múlik nysanyn rásimdeý josparlanǵan. Osylaısha jalpy quny 4,4 mlrd teńgeden asatyn páterlerdi zańsyz ıemdený áreketiniń joly kesildi. Qylmystyq top músheleriniń árqaısysyna naqty mindet júktelgen. Biri jalǵan úleskerlerdi taýyp, olardyń atyna jalǵan sharttar rásimdese, endi biri sol sharttardy ózge azamattarǵa satyp, qylmystyq isterdiń júrgizilýine yqpal etken. Qylmystyq top kooperatıvke jarna tóleý týraly jalǵan sharttardy azamattarǵa satqan. Sonyń saldarynan azamattarǵa 400 mln teńgeden astam shyǵyn kelgen. Sonymen qatar bul iske polıtsııa qyzmetkerleriniń de qatysy bary anyqtaldy. Laýazymdyq ókilettikterin teris paıdalaný jáne dáleldemelerdi burmalaý derekteri boıynsha tergeý bastaldy.
— Іs boıynsha 19 adam kúdikti dep tanylyp, olardyń toǵyzy qamaýǵa alyndy. Kúdiktilerdiń jalpy quny 250 mln teńgeden asatyn múlkine tyıym salyndy, — delingen habarlamada.
Sotqa deıingi tergeý aıaqtaldy. Qylmystyq protseske qatysýshy taraptar is materıaldarymen tanysýǵa kiristi. Ózge málimetter Qazaqstan Respýblıkasy Qylmystyq-protsestik kodeksiniń 201-babyna sáıkes jarııa etilmeıdi.
Eske salaıyq, buǵan deıin Mańǵystaý aýrýhanasynyń bas esepshisi 32 mln teńgeden astam qarjyny jymqyrǵany úshin sottalǵanyn jazǵan edik.
