Astanada Jetisý ónimderiniń jármeńkesi bastaldy
ASTANA. QazAqparat - Astanada «Qazaqstan» sport kesheni janynda Almaty oblysynyń aýylsharýashylyq ónimderi arzan baǵamen satylyp jatyr, dep habarlaıdy QazAqparat tilshisi.
Jalpy kólemi 470 tonnadan asatyn Jetisý ónimderi elordada eki kún boıy saýdalanbaq.
«Almaty oblysynyń ónimderin Astana jurtshylyǵy biledi, asyǵa kútedi. Búgin de 470 mln teńge bolatyn azyq-túlikti qyryqtan astam avtokólikpen jetkizdik. Bul taýarlar naryqtaǵy baǵadan 10-25% deıin, keı ónimder tipti 33% deıin arzan satylyp jatyr. Bizdiń aımaqta óńdeý ónerkásibi de jaqsy damyǵan. Búgingi bazarda «Almaty bottlers», «Alma bıo», «Sarybulaq», «Alataý qus» syndy tanymal markalar bar», - dedi Almaty oblystyq aýyl sharýashylyǵy basqarmasynyń basshysy Seksembaı Bekishov jýrnalısterge bergen suhbatynda.
Basqarma basshysynyń habarlaýynsha, bıyl jetkizilgen ónim kólemi 110 tonnaǵa artyq jáne ónim túri 48-ge kóbeıdi. Onyń ishinde kókónis 160,1 tonna, et ónimderi - 21,8 tonna, sút ónimderi - 13,7 tonna, jemis-jıdek - 35,9 tonna, kartop - 41,9 tonna, balyq ónimderi - 11,7 tonna jáne ózge ónimder 175 tonnany qurap otyr.
«Almaty oblysynda qaýyn-qarbyzǵa deıin jemis-jıdektiń barlyq túri ósedi. Búgingi jármeńkege oblystaǵy 17 aýdan, Taldyqorǵan, Tekeli, Qapshaǵaı qalalary men «Jetisý» ÁKK sharýalary tutas atsalysýda. Óńirimizden shyqqan taýarlar apta saıyn Almaty qalasynda satylady. Onda qarbyzǵa arnalǵan, qaýyn, júzimge arnalǵan jármeńkeler ótedi. Aldaǵy ýaqytta pııaz jármeńkesin uıymdastyramyz. Bul baǵanyń turaqtanýyna, halyqtyń qysqa qamdanýyna septigin tıgizedi», - dep óz sózin tolyqtyrdy S. Bekishov.
