Astanada jetimderge jáne az qamtylǵan otbasy balalaryna kınoteatrǵa kirý tegin bolmaq
ASTANA. QazAqparat - Astanada az qamtylǵan otbasy balalaryna jáne jetimderge «Saryarqa» kınoteatrlary tegin jumys jasaıtyn bolady.
Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Astana qalasy Bilim basqarmasynyń basshysy Elmıra Sýhanberdıeva málim etti.
«Balalardy qorǵaý kúniniń qarsańynda Astana qalasynyń ákimdigi Bilim basqarmasy 1 maýsymda birqatar is-sharalar ótkizedi. Elordalyq saıabaqta tańerteń onnan bastap keshke deıin «Sálem, jaz!» atty oıyn-saýyq baǵdarlamasy uıymdastyrylady. Estrada juldyzdarynyń qatysýymen qalanyń barlyq alańdarynda kontsertter ótedi. Sonymen qatar jańa Oqýshylar saraıynyń aldynda balalar men olardyń ata-analaryn merekelik baǵdarlama kútip tur», - dedi ol.
Sondaı-aq qalada jetkinshekter men balǵyndardyń 1 maýsym kúni jaqsy demalýyna jasalatyn jaǵdaılar bunymen aıaqtalmaıdy.
«Astanada az qamtylǵan otbasy balalaryna jáne jetimderge «Saryarqa» kınoteatrlar jelisi tegin jumys jasaıtyn bolady. Sonymen qatar bul balalardy «Dýman» oıyn-saýyq ortalyǵyndaǵy okeanarıým men djýnglı anımatronıks keshenderi de tegin kirgizedi. 1 maýsym kúni barlyq balalardyń avtobýstarda jolda júrýi tegin bolady», - dedi E.Sýhanberdıeva.
