Astanada jetim balalardy qamqorlyǵyna alǵan abzal jandarǵa qurmet kórsetildi
ASTANA. 30 qazan. QazAqparat /Jasulan Amanbaıuly/ - Keshe, senbide Astanadaǵy №66 mektep-lıtseıinde «Qamqorshy kúnine» oraı respýblıkalyq «Balalarǵa jylý syıla» atty merekelik shara ótti.
Sharanyń basty maqsaty jetim balalardy qamqorlyǵyna alǵan abzal jandardy marapattaýǵa baǵyttalǵan. Merekege 200-den astam qamqorshy men patronat otbasy músheleri, demeýshiler men tárbıeleýshi mamandar shaqyryldy.
Sharaǵa qatysqan Astana qalasy Bilim basqarmasynyń bastyǵy Ásıma Bımendınanyń aıtýynsha, qazirgi kúni elordada ata-anasynyń qamqorlyǵynsyz qalǵan balalardyń jáne tul jetimderdiń sany 1024, onyń 536-sy qamqorshy otbasylarynda tárbıelenýde. Qalǵan 488 bala balalar úıinde jáne «Pana» atty arnaıy mekemelerde turyp jatyr.
Onyń aıtýynsha, «Balalarǵa jylý syıla» atty aktsııa Qazaqstanda byltyr bastalǵan jáne dástúrli is-sharalardyń biri retinde qolǵa alynýda.
«Jetim qalǵan balalardy óz úılerine alyp, baýyr basyp jatqan otbasylarǵa biz árqashan qoldaý kórsetýge tıispiz. Sońǵy úsh jylda osy balalardy asyrap alýǵa nıeti bar astanalyqtardyń sany ulǵaıyp keledi. Qaladaǵy balalar úıinde tárbıelenip jatqan balǵyndarymyzdyń sany da birshama azaıyp keledi», - deıdi ol.
Jalpy Qazaqstanda 25 myńnan astam jetim jáne ata-ananyń qamqorlyǵynsyz qalǵan balalar qamqorshylyq januıalarynda tárbıelenýde. Salystyrmaly málimet boıynsha, balalar úılerindegi jetimder sany 15 myńnan astam, al patronattyq tárbıedegi bul kórsetkish 2 myńnan asady.
