Astanada jeti birdeı jańa kitaptyń tusaýy kesildi
«Bizdiń qor qazaq ádebıetiniń tanymal klassıkterine de, jas daryndy jazýshylardyń qalam tartýyna qoldaý jasap keledi. Qazaqstannyń barlyq túkpirinen jyl saıyn jańa talanttardy, aqıyq aqyndardy taýyp otyramyz. Keıin úsh kezeńdik irikteýden suryptap, olardyń eń úzdik shyǵarmalaryn kitapqa basyp, oqyrmanǵa tanystyrýdy dástúrge aınaldyrdyq», - deıdi «Altyn Qyran» halyqaralyq qaıyrymdylyq qorynyń prezıdenti Islambek Saljanov.
Onyń sózine qaraǵanda, tanystyrylǵan kitaptardyń árqaısysy 1 myń danamen basylǵan. Suranys artqan saıyn qor kitaptardy qosymsha basyp shyǵaryp, avtorlarǵa tegin berip otyrmaq.
Kitap avtorlarynyń ishinde jınaqtaryn tuńǵysh ret shyǵaryp otyrǵan Álııa Dáýletbaeva («Sol bir sáýle» óleńder jınaǵy), Janar Ábsadyq («Sezimder maýsymy» jyr jınaǵy), Qýanysh Medeýbaev («Qara jáshik» óleńder jınaǵy) sııaqty jas aqyndarmen qatar, kitaptary suranysqa ıe Beıbit Sarybaı («Meıirim» áńgimeler jınaǵy), Azamat Tasqara («Jýsanqyz» óleńder jınaǵy), Dýman Anash («Áýlet» zertteý maqalalar jınaǵy), Ǵalym Smaǵul (karıkatýra albomy) syndy qýatty qalam ıeleri men qarymdy jýrnalıster bar.
Halyqaralyq «Altyn Qyran» qory 2012 jyly alty jas qalamgerdiń kitabyn jaryqqa shyǵarǵan. Al 2013 jyly qadirli qalamger Ábdijámil Nurpeıisovtiń «Qan men ter», «Sońǵy paryz» kitaptarynyń aǵylshyn tiline aýdarylýyna qoldaý jasady.