Astanada jer úılerge ystan qorǵaıtyn qurylǵy ornatyla bastady
ASTANA. QazAqparat - Astana qalasy Saryarqa aýdanynyń jeke sektoryndaǵy úılerge ys pen tútinnen qorǵaıtyn qurylǵy ornatyla bastady, dep habarlaıdy QazAqparat.
«Djentelmender klýbyndaǵy Arman Qashqynbekov pen Sanjardyń demeýshilik kómegimen kópbalaly otbasylardyń, aýdandaǵy jeke sektorda turatyn áleýmettik az qamtylǵan otbasylardyń úıine ys pen tútinnen qorǵaıtyn qurylǵy ornatyla bastady. TJ, JPQ aýdandyq basqarmalary men eriktilerden quralǵan, jeke sektordyń úılerin aralap shyǵatyn mobıldi toptar quryldy», - dep jazady Astana qalasy Saryarqa aýdany ákiminiń baspasóz hatshysy Bıbgúl Ábiddın Feısbýk paraqshasynda.
Onyń aıtýynsha, toptyń quramyndaǵy mamandar úıge ornatylǵan peshterdiń qaýipsizdigin tekserip, tútin shyǵatyn murjasyn tazartyp berip júr.
«Nıet bildirgen jandardyń bárin mobıldi toptardyń quramyna kirýge shaqyramyz. Tótenshe jaǵdaı boıynsha qyzmetkerlermen birge barlyq úı ıelerin tartyp, órt qaýipsizdigin tekseretin azamattyq monıtorıng uıymdastyrylmaq», - deıdi ol.
