Astanada jer ýchaskesin alýǵa nıetti 13,5 myń adam arnaıy esepte tur
ASTANA. QazAqparat - Astanada 13,5 myń adam jeke turǵyn úı qurylysy úshin jer ýchaskesin alý úshin arnaıy esepte tur, dep habarlady «QazAqparat» HAA tilshisi.
Bul aqparatty QazAqparattyń resmı saýalyna jaýap retinde elordalyq jer qatynastary jáne jerdi paıdalanýdy baqylaý basqarmasy usyndy.
«Osy jyly Astana qalasynda JTQ úshin jer ýchaskesin alýǵa ótinish bergen barlyq azamattar joǵaryda kórsetilgen normaǵa sáıkes arnaıy esepke alyndy (Osy jyly barlyǵy 13,5 myń ótinish tústi)», - delingen mekeme basshysy N. Kenjebaevtyń qoly qoıylǵan hatta.
Azamattardy arnaıy esepke alýdy kózdeıtin QR UEM 2015 jylǵy 27 naýryzdaǵy №255 buıryǵymen bekitilgen jeke turǵyn úı qurylysyn salýǵa jer ýchaskesine quqyq berý qaǵıdasy: «QR azamattary men oralmandar jeke turǵyn úı qurylysy úshin jer ýchaskesin suraǵan kezde jer ýchaskesin bólý úshin alań bolmaǵan jaǵdaıda, jergilikti atqarýshy organdar osy qaǵıdanyń 13-tarmaǵynda kózdelgen komıssııanyń qorytyndysy negizinde bes jumys kúni ishinde arnaıy esepke alady».
