Astanada jer telimderin alýdyń tártibi túsindirildi
ASTANA. QazAqparat - Astana qalasynyń ákimdigi shahar qurylysy men Bas jospardy damytý maqsatynda memlekettik qajettilikterge arnalǵan jer telimderin alý jónindegi is-sharalardy júzege asyrýda. Olardyń basym bóligin (99%) baqsha ýchaskeleri quraıdy.
Búgin «Memlekettik qajettilikterge arnalǵan jer telimderin alý máselelerin túsindirý» taqyrybynda ótken brıfıngte ákimdik pen vedomstvoǵa qarasty uıymdardyń ókilderi jer telimderin alý protsedýralary men jer teliminiń ıeleriniń quqyqtary týraly aıtyp berdi. Bul týraly ákimdiktiń baspasóz qyzmeti habarlady.
«Alynatyn jer telimderin baǵalaý boıynsha konkýrs ótkiziledi. Baǵalaýdy ákimdik emes, osy qyzmetpen aınalysýǵa barlyq qajetti lıtsenzııasy bar táýelsiz baǵalaý kompanııasy júrgizedi. Baǵalaý menshik ıesin habardar ete otyryp qolǵa alynady, sodan keıin menshik ıesi qoıylǵan baǵamen tanysady. Ol atalǵan somamen kelisse, kelisimderdiń bári máslıhat komıssııasyna joldanady, jergilikti ýákiletti organmen qaralady. «Memlekettik múlik týraly» zańda da osylaı jazylǵan. Tek sodan keıin ǵana satyp alý jáne qajetti ótemaqylardy tóleý protsedýralary júrgiziledi. Menshik ıeleriniń 80% astamy ǵana kelisip, eshqandaı sot áreketterinsiz óz ótemaqylaryn alady», - dedi «Qalalyq jyljymaıtyn múlik» MKK dırektory Mıras Shekenov.
Onyń aıtýynsha, keıbir adamdar osy shartpen kelispeı, sotqa júginedi. Bul rette keıbir baqsha ýchaskeleri menshik ıeleriniń kelispeý sebebi, atalmysh telimdi turaqty ómir súrýge paıdalanyp otyrýmen jáne alý kezinde sáıkesinshe uqsas maqsattaǵy jer telimderinen bas tarta otyryp, memleketten turmysqa jaıly turǵyn úı nemese jeke turǵyn úı qunyna para-par ótemaqy talap etýlerimen túsindiriledi. Bul rette uqsas maqsattaǵy jerlerden bas tartady.
«Kelispeı otyrǵan adamdarǵa kelsek, men nazarlaryńyzdy myna bir jaıtqa aýdarmaqpyn. Ákimdik saıajaılar, baqsha ýchaskelerinen basqa, tikeleı úılerdi de satyp alady, ıaǵnı jeke turǵyn úı salýǵa arnalǵan jer ýchaskelerin, biraq olarmen esh qıyndyq týyndamaıdy. Sebebi adamdar ózderiniń maqsattaryna laıyq ótemaqy alady. Qazirgi ýaqytta másele baqsha ýchaskelerinde turyp jatqan adamdarǵa baılanysty bolyp otyr. Bul shynynda da áleýmettik máselege aınaldy. Degenmen, bárimiz de túsinýimiz kerek. Eń áýeli biz turǵyn úıdiń qandaı ekenin anyqtaımyz. Bul turǵyn úı me? Kóp jaǵdaıda (99%) - bul ýchaskeler baq sharýashylyǵyna arnalǵan, biraq adamdar ony turǵyn úı retinde paıdalanýǵa májbúr», - dedi M.Shekenov.
Zańǵa sáıkes baqsha ýchaskelerindegi qurylys turǵyn úı bolyp tabylmaıdy. Óıtkeni merzimdi sıpatta (ýaqytsha) jáne turaqta ómir súrýge baǵyttalmaǵan.
Brıfıngke qatysýshylar atap ótkendeı, qala aýmaǵynda baqsha nemese saıajaı qurylysyn damytý qarastyrylmaǵan. Onda oryn tepken barlyq baqsha alaptary memleketke qaıtarylý tıis jáne sol aýmaqta bolashaqta túrli áleýmettik-mádenı-turmystyq nysandar (aýrýhana, balabaqsha, mektep jáne t.b.) joldar, saıabaqtar, gúlzarlar jáne t.b. salý kózdelgen.
Aıta keteıik, memlekettik qajettilikterge arnalǵan jer telimderin alý kezinde memleket zańnama talaptaryn saqtaıdy jáne memleketke de, jer telimderiniń ıelerine de tıimdi bolýy úshin osyndaı jaǵdaılardy sheshý úshin barlyq sharalardy qabyldaıdy.
