Astanada jer qazý kezinde kabel zaqymdanyp, turǵyndar ınternetsiz qaldy
ASTANA. KAZINFORM — Astananyń bir bóliginde ınternet, telefon jáne TV ýaqytsha istemeı qaldy. «Qazaqtelekom» kabeldi qalpyna keltirip jatqanyn habarlady.
Kompanııanyń málimetinshe, 21 shilde kúni kúndiz Astanada Almaty men Aqmeshit kósheleriniń qıylysynda, Saýran kóshesi, 12 mekenjaıy mańynda bógde uıym kóldeneń-baǵyttalǵan burǵylaý ádisimen jer qazý kezinde ATS-40 qamtý aımaǵyndaǵy abonentterdi baılanyspen qamtamasyz etetin ártúrli syıymdylyqtaǵy 25 optıkalyq kabeldi zaqymdady. Sonyń saldarynan birqatar abonentterde ınternet, telefonııa jáne televızııany qosa alǵanda, baılanys qyzmetteri ýaqytsha qoljetimsiz bolyp qaldy.
— Qazir oqıǵa ornynda «Qazaqtelekomnyń» avarııalyq-qalpyna keltirý brıgadalary jumys istep jatyr. Zaqymdaný kóleminiń úlken bolýyna baılanysty qyzmetter kezeń-kezeńimen qalpyna keltiriledi: keıbir abonentterde baılanys erterek, al qalǵandarynda tıisti jeli ýchaskelerindegi jumystar aıaqtalǵan saıyn qosylady. Jóndeý jumystary búgin saǵat 23:00-ge deıin aıaqtalady dep josparlanǵan, — delingen habarlamada.
Aıta keteıik, jer jáne qurylys jumystaryn júrgizý kezinde bógde uıymdardyń kabeldik ınfraqurylymdy zaqymdaýy baılanys jelilerindegi apattardyń jıi kezdesetin sebepteriniń biri bolyp otyr. Kóptegen jaǵdaıda mundaı oqıǵalar ruqsatsyz, jumys istep turǵan kabel jelileriniń ornalasqan jerin anyqtamaı júrgizgen kezde týyndaıdy.
Buǵan deıin áleýmettik mańyzy bar qosymshalardy paıdalaný kezinde ınternet aqysy alynbaıtynyn jazǵan edik.
