Astanada Jeńistiń 80 jyldyǵyna oraı «Qamqorlyq mekenjaıy» aktsııasy bastaldy
ASTANA. KAZINFORM – Elordada 3 mamyr kúni Uly Otan soǵysyndaǵy Jeńistiń 80 jyldyǵyna oraı jyl saıynǵy «Qamqorlyq mekenjaıy» aktsııasy bastaldy, dep jazdy elorda ákimdiginiń resmı saıty.
Іs-shara «Astana jastary» jastar resýrstyq ortalyǵynyń bastamasymen uıymdastyryldy. Aktsııa aıasynda eriktiler tyl ardagerleri men soǵys balalaryna Jeńiske qosqan úlesterine alǵys bildirý úshin bardy.
Aktsııanyń alǵashqy kúni eriktiler 12 ardagerdiń úıine baryp, olarǵa UOS-taǵy Jeńistiń 80 jyldyǵyna oraı medal, sondaı-aq sımvoldyq syılyq retinde shaı sebetterin tabys etti.
«Astana jastary» JRO Jastar bastamalaryn qoldaý bóliminiń basshysy Araılym Saparáli aktsııa tyl eńbekkerleriniń erligi týraly estelikterdi saqtaýǵa jáne qundylyqtardy jas urpaqqa nasıhattaýǵa baǵyttalǵanyn atap ótti.
- Surapyl soǵys pen tar zaman ýaqytynda maıdannyń ıgiligi úshin ólsheýsiz eńbek etken bul adamdar erekshe kóńil men qurmetke laıyq. Biz olarǵa alǵys aıtyp, qurmet kórsetýge keldik, - dedi ol.
Quttyqtaǵandar arasynda balalyq shaǵyn soǵys jyldarynda ótkizgen jáne otbasymen birge tylda kómektesken Ulbolǵan Omarqyzy da boldy. Ol sol ýaqyttaǵy qıyn kezeńder, esinde óshpesteı bolyp qalǵan oqıǵalar, Jeńis kúni týraly estelikteri jaıly aıtty.
Іs-shara 6 mamyrǵa deıin jalǵasady jáne elordada Jeńis kúnin merekeleýge arnalǵan daıyndyqtyń bir bóligi bolady.
Buǵan deıin «Soǵystan qaıtqan soldattar» áni qalaı shyqqanyn jazǵan bolatynbyz.