Astanada jeńildik kólik kartasyn kimder rásimdeı alady
ASTANA. KAZINFORM — Qoǵamdyq kólikte jol júrýge arnalǵan ataýly kólik kartalaryn Tarlan Astana kassalarynda rásimdeýge bolady.
17 qazannan bastap elordanyń qoǵamdyq avtobýstarynda jol júrýge arnalǵan oqýshylar men jeńildik sanatyndaǵy azamattardyń ataýly kólik kartalaryn Tarlan Astana-nyń 18 stantsııasynda rásimdeýge bolady.
Ortalyq kassadan bólek, kólik kartalaryn rásimdeıtin mamandandyrylǵan kassalardyń sany artady. Bul elorda turǵyndary úshin atalǵan qyzmettiń qoljetimdiligin arttyrýǵa múmkindik beredi.
Atalǵan kassalarda avtobýsta jáne «Tarlan Astana» jeńil relsti kóliginde jolaqy tóleýge arnalǵan jeńildigi bar jáne mektep kólik kartalaryn rásimdeýge bolady.
Ataýly kólik kartalaryn myna sanattaǵy azamattar rásimdeı alady:
• elordadaǵy oqý oryndarynda bilim alatyn 7 men 18 jas aralyǵyndaǵy oqýshylar;
• Astana q. tirkelgen jáne turaqty turatyn, Astana q. máslıhaty bekitken jeńildik sanattaryna jatatyn azamattar.
Mektep kólik kartasyn rásimdeý úshin myna qujattar qajet:
• ata-anasynyń nemese zańdy ókilderiniń biriniń jeke kýáliginiń túpnusqasy ne tólqujaty;
• balanyń JSN kórsetilgen týý týraly kýáliginiń túpnusqasy;
• Astana q. oqý ornynan anyqtamanyń túpnusqasy;
• ólshemi 3 × 4 sm nemese 4 × 6 sm túrli tústi fotosýret.
Jeńildik kólik kartasyn rásimdeý úshin qajetti qujattar:
• jeke kýáliktiń túpnusqasy nemese tólqujat;
• zeınetkerlik kýáliktiń túpnusqasy;
• ólshemi 3 × 4 sm nemese 4 × 6 sm túrli tústi fotosýret.
eGov Mobile mobıldi qosymshasyndaǵy tsıfrlyq qujattardy, onyń ishinde «Áleýmettik ID» qujaty da jaramdy.
Aıta ketelik Astanada qoǵamdyq kólikte jol júrý aqysy 150 teńgege kóterilmek. Sonymen qatar elorda avtobýstarynda qolma-qol aqshamen jolaqy tóleý qaıta engizilmek.
