Astanada jeńildetilgen dári-dármekpen qamtýǵa 34,4 mlrd teńge suraldy
ASTANA. KAZINFORM – Astanada ambýlatorııalyq deńgeıde jeńildetilgen dári-dármekpen qamtamasyz etý baǵdarlamasy jergilikti jáne respýblıkalyq bıýdjet, sondaı-aq mindetti áleýmettik medıtsınalyq saqtandyrý júıesi esebinen jalǵasyp jatyr. Bul týraly Astana qalasy máslıhatynyń kezekti sessııasynda qalalyq Qoǵamdyq densaýlyq saqtaý basqarmasynyń basshysy Aınur Tóleýova málim etti.
Onyń aıtýynsha, tegin beriletin dárilik zattardyń tizbesi Qazaqstan Respýblıkasy Densaýlyq saqtaý mınıstriniń №75 buıryǵyna sáıkes qalyptastyrylady.
– Ambýlatorııalyq deńgeıde jeńildetilgen dári-dármekpen qamtamasyz etý máslıhattyń sheshimi boıynsha jergilikti bıýdjet qarajaty esebinen, sondaı-aq Densaýlyq saqtaý mınıstriniń №75 buıryǵymen bekitilgen tegin dárilik zattar men medıtsınalyq buıymdar tizbesi aıasynda respýblıkalyq bıýdjet pen mindetti áleýmettik medıtsınalyq saqtandyrý qarajaty esebinen júzege asyrylady. Búginde atalǵan tizbege 95 nozologııa, dárilik zattar men medıtsınalyq buıymdardyń 502 ataýy engizilgen, – dedi Aınur Tóleýova.
Basqarma basshysynyń málimetinshe, 2026 jyldyń alǵashqy bes aıynda 177 nozologııa boıynsha shamamen 120 myń patsıent tegin dári-dármekpen qamtamasyz etilgen. Osy kezeńdegi qarjylandyrý kólemi 12,8 mlrd teńge boldy.
Sondaı-aq 2026 jylǵa belgilengen lımıt sheńberinde dárilik zattarmen qamtamasyz etýge 34,4 mlrd teńge kóleminde ótinim berilgen.
Aınur Tóleýova sırek kezdesetin orfandyq aýrýlarǵa shaldyqqan patsıentter Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» kodeksine sáıkes jergilikti bıýdjet esebinen dári-dármekpen qamtamasyz etiletinin atap ótti.
– Bıyl jergilikti bıýdjetten 64 nozologııa boıynsha shamamen 2 myń patsıentti dári-dármekpen qamtamasyz etýge 5,4 mlrd teńge bólindi, – dedi ol.
Sonymen qatar 2026 jylǵa osy maqsatqa qosymsha shamamen 556 mln teńge qarastyrý usynyldy. Basqarma bul usynysty bıýdjettik josparlaý aıasynda qoldaýdy surady. Máslıhat depýtattary atalǵan usynysty qoldap, tıisti sheshim qabyldady.
Sonymen qatar Astanada orfandyq aýrýlary bar naýqastardy dárimen qamtýǵa qosymsha qarajat bólinedi.
