Astanada jeńil relsti kólik stantsııalary qandaı ataýǵa ıe bolady

ASTANA. KAZINFORM — Astana qalasyndaǵy jeńil relsti kólik (LRT) jelisiniń stantsııalaryna ataý berý máselesi kún tártibine qoıyldy. Bul týraly Astana qalasy Tilderdi damytý jáne muraǵat isi basqarmasynyń basshysy Sáken Zııabekuly Esirkep qalalyq máslıhattyń 40-shy kezekten tys otyrysynda málimdedi.

— Ózderińizge belgili, Astana qalasyndaǵy jeńil relsti kólik jelisiniń qurylysy aıaqtalýǵa jaqyn. Jobada 18 stantsııa qarastyrylǵan. Qoldanystaǵy zańnamaǵa sáıkes árbir stantsııaǵa ataý berilýi tıis. Osy maqsatta jyl basynan beri birqatar kezdesý ótkizdik. Jıyndarǵa zııaly qaýym ókilderi, tarıhshy ǵalymdar, onomastıka salasynyń mamandary, máslıhat depýtattary, qoǵamdyq keńes músheleri, Parlament ókilderi men ýákiletti organdardyń qyzmetkerleri qatysty. Ár stantsııa boıynsha túrli usynystar aıtyldy, — dedi basqarma basshysy.

Sáken Esirkeptiń aıtýynsha, álemdik tájirıbede metropolıten nemese jeńil relsti kólik júıelerindegi stantsııa ataýlary sol mańda ornalasqan mańyzdy nysandarǵa baılanysty qoıylady. Bul qala turǵyndary men qonaqtarynyń jol tabýyn jeńildetý úshin jasalatyn qadam.

— Atalǵan tájirıbeni biz de negizge alýdy jón kórdik. Sebebi azamattar ózderine qajet nysandardy ońaı taba alady. Osylaısha, baǵyt tańdaýda da jeńildik týady, — dedi ol.

Osyǵan oraı, bıyl 1 tamyz kúni qalalyq onomastıka komıssııasynyń kezekti otyrysy ótip, stantsııa ataýlaryna qatysty usynystar talqylandy. Saraptamalyq qorytyndy negizinde ortaq sheshim qabyldanyp, hattamamen rásimdeldi. 

Usynylǵan ataýlar tizimi tómendegideı:

— 101 stantsııa — Áýejaı, ornalasqan jeri — Nursultan Nazarbaev halyqaralyq áýejaıy;
— 102 stantsııa — Atameken, Arnasaı kóshesi men Qabanbaı batyr dańǵylynyń qıylysy, Áljan ana meshiti mańy;
— 103 stantsııa — Esil, Jańadarııa kóshesi men Máńgilik El dańǵyly aralyǵy, Avıator saıajaıy;
— 104 stantsııa — Máńgilik El, Qabanbaı batyr men Máńgilik El dańǵyldarynyń qıylysy;
— 105 stantsııa — Astana juldyzy, Qabanbaı batyr dańǵyly boıy, Astana juldyzy aınalma joly mańy;
— 106 stantsııa — Nura, Qabanbaı batyr men Hýseın ben Talal kósheleriniń qıylysy;
— 107 stantsııa — Ýnıversıtet, 29/2 kóshe men Qabanbaı batyr dańǵylynyń qıylysy;
— 108 stantsııa — Uly dala, Buqar jyraý kóshesi men Uly Dala dańǵyly aralyǵy;
— 109 stantsııa — Astana Arena, Alaý muz aıdynyna qarama-qarsy ornalasqan;
— 110 stantsııa — Jekpe-jek saraıy, Orynbor kóshesi men Qabanbaı batyr dańǵylynyń qıylysy;
— 111 stantsııa — Syǵanaq, Syǵanaq kóshesi men Qabanbaı batyr dańǵylynyń qıylysy;
— 112 stantsııa — Báıterek, «Abu Dhabi Plaza» SOO janynda ornalasqan;
— 113 stantsııa — Mınıstrlikter úıi, Roza Baǵlanova atyndaǵy Qazaqkontsert zaly mańy;
— 114 stantsııa — Ulttyq mýzeı, QR Ulttyq mýzeıi janynda;
— 115 stantsııa — Teatr, Saǵadat Nurmaǵambetov kóshesi;
— 116 stantsııa — Myńjyldyq alleıasy, Maǵjan Jumabaev dańǵylynyń mańy;
— 117 stantsııa — Jibek joly, «Geneva» turǵyn úı kesheni mańy;
— 118 stantsııa — Nurly jol, Nurly jol temirjol vokzaly aýmaǵy.

Basqarma basshysynyń aıtýynsha, usynylǵan ataýlar Astana qalasy ákimdiginiń qaýlysymen jáne qalalyq máslıhattyń sheshimimen bekitilýge engizildi. Eger usynystar maquldansa, qujattar QR Úkimeti janyndaǵy Respýblıkalyq onomastıka komıssııasyna joldanatyn bolady.

— Komıssııa tarapynan oń sheshim shyqqan jaǵdaıda, máslıhatta túpkilikti túrde bekitiledi, — dedi Sáken Zııabekuly.

Buǵan deıin, LRT negizgi jelisinde relsterdi tóseý jumystary aıaqtalǵanyn jazǵanbyz.