Astanada jeńil atletıkadan Qazaqstan chempıonaty ótedi
ASTANA. KAZINFORM — Astanada ótetin jeńil atletıkadan Qazaqstan Respýblıkasynyń chempıonaty 22–24 shilde aralyǵyna josparlanǵan, dep habarlaıdy UOK baspasóz qyzmeti.
El birinshiligine Qazaqstannyń 17 óńirinen 265-ten astam sportshy qatysady. Úsh kún boıy erler men áıelder arasynda 48 jeke baǵdarlama boıynsha, sondaı-aq, 4×100 jáne 4×400 metrlik aralas estafetalarda júldeler sarapqa salynady.
Jarys jolyna Qazaqstan ulttyq quramasynyń kóshbasshylary shyǵady. Olardyń qatarynda Karolın Chepkoech Kıpkırýı, Deızı Djepkemeı, Krıstına Ovchınnıkova, Nadejda Dýbovıtskaıa, Elızaveta Matveeva, Anastasııa Rypakova, Marııa Efremova, Adelına Zems, Andreı Sokolov, Elnýr Muhıtdınov, Ivan Ivanov, Ivan Tovchennık, Vıktorııa An, Vıtalıı Zems, Vıacheslav Zems jáne basqa da sportshylar bar.
Federatsııanyń baspasóz qyzmetiniń málimetinshe, Qazaqstan chempıonatynyń qorytyndysy boıynsha 2026 jyly Japonııada ótetin Azııa oıyndaryna qatysatyn Qazaqstan quramasynyń tizimi anyqtalady.
Aıta keteıik, jarystar Qazaq ulttyq sport ýnıversıtetiniń stadıonynda ótedi. Al laqtyrý dıstsıplınalary boıynsha júldeler Qazaqstan jeńil atletıkalyq sport kesheniniń sektorlarynda sarapqa salynady.
Budan buryn Qazaqstan jeńil atletıkadan Azııa chempıonatyn alty medalmen aıaqtaǵanyn jazǵanbyz.
