Astanada jeńil atletıka estafetasynyń úzdikteri anyqtaldy
ASTANA. KAZINFORM - Búgin jeńil atletıkadan Jeńis kúnine oraı stýdentter men mektep oqýshylary arasynda dástúrli estafeta saıysy ótti.
Qalalyq sport basqarmasynyń baspasóz qyzmeti málim etkendeı, Astana qalasynyń keremet jerleriniń biri — «Trıatlon» saıabaǵynda jeńil atletıkadan JOO, kolledj stýdentteri men mektep oqýshylary arasynda kezekti estafeta jeńimpazdary anyqtaldy.
Іs-sharanyń saltanatty ashylýyna Astana qalasynyń Dene shynyqtyrý jáne sport basqarmasy basshysynyń orynbasary Islambek Baımanov qatysyp, qatysýshylarǵa sáttilik tiledi.
«Jeńis kúnine arnalǵan jyl saıynǵy jeńil atletıka estafetasynda jastarymyzdy taǵy da kórgenime qýanyshtymyn. Bul merekelik jarys jaqsy dástúrge aınalǵanyna kóńil qýantady. Aıtýly is-sharaǵa jyl saıyn myńǵa jýyq elordalyq stýdentter men mektep oqýshylary qatysýda. Estafetanyń maqsaty – jastardy sportqa baýlyp, salaýatty ómir saltyn nasıhattaý. Sonymen qatar ardagerlerge qurmet kórsetý, qalamyzda jeńil atletıkanyń damýyna yqpal etip, úzdik komandalardy anyqtaý. Barshańyzǵa sáttilik pen jarqyn jeńister tileımin!» - dedi ol.
Jarys barysynda 10 adamnan turatyn ár komanda 10 kezeń boıynsha 2 250 metrdi qashyqtyqty júgirip ótti.
«Táýelsizdik alǵaly beri uıymdastyrylyp kele jatqan júgirý estafetasy bıyl ekinshi márte Trıatlon saıabaǵynda ótip jatyr. Buǵan deıingi jyldary sharamyz qala ishindegi Jeńis dańǵylynda bastaýyn alatyn edi. Biraq sońǵy jyldary jyl saıyn elordamyzǵa 50-60 myń adamnyń kóship kelýine baılanysty kólik aǵyny kóbeıdi. Sondyqtan ózgelerge kedergi jasamaý úshin osyndaı qadamǵa bardyq» - dedi jarystyń bas tóreshisi Dáýlet Hamzın.
Aıta ketelik, estafetada 4 JOO, 7 kolledj, 15 mektep baq synady.
Týrnırdiń qorytyndysy kelesideı:
Mektep arasynda
1-oryn. №32 gımnazııa mektebi
2-oryn. №22 gımnazııa mektebi
3-oryn. Qasym Qaısenov atyndaǵy №32 mektep lıtseıi
Kolledj arasynda
1-oryn. Pedagogıkalyq kolledj
2-oryn. Astana polıtehnıkalyq kolledji
3-oryn. Menedjment jáne Bıznes kolledji
Ýnıversıtet arasynda
1-oryn. Astana halyqaralyq ýnıversıteti
2-oryn. Aýyl sharýashylyq ýnıversıteti
3-oryn. Medıtsına ýnıversıteti
«3-shi jyl qatarynan dál osy saıysqa qatysyp kele jatyrmyn. Ótken 2 jylda júzden úzdik shyǵyp, chempıon atanǵan bolatynbyz. Ýnıversıtetimizde dál osy týrnırge arnaıy túrde daıyndyq júrgizemiz. Bul jerde jyldamdyqpen qatar, taıaqty durys berý de úlken ról oınaıdy. Sondyqtan osy faktorǵa nazar aýdarǵannyń arqasynda jeńiske jetip kele jatyrmyz», - dedi Astana Halyqaralyq ýnıversıtetiniń fızıka mamandyǵy boıynsha 3 kýrs stýdenti Ádilhan.
Іs-shara sońynda jeńimpazdar arnaıy estelik syılyqtarmen marapattaldy.
