Astanada Jeńistiń 70 jyldyǵyna arnalǵan is-sharalar jospary júzege asyrylýda
Bul týraly elorda ákimdiginiń resmı saıtynan habarlady.
Qalalyq máslıhat depýtattary Jeńistiń 70 jyldyǵyna arnalǵan is-sharalar josparymen tanysty. Jınalysqa Astana qalasy ákiminiń orynbasary Ermek Amanshaev, qalalyq máslıhattyń hatshysy Sansyzbaı Esilov, sondaı-aq máslıhattyń áleýmettik-mádenı damý komıssııasynyń tóraǵasy Abaı Baıgenjın, qalalyq jáne aýdandyq basqarmalardyń basshylary qatysty.
Elorda ákiminiń orynbasary málim etkendeı, qazirgi ýaqytta Uly Otan soǵysyndaǵy Jeńistiń 70 jyldyǵyna arnalǵan is-sharalar jospary júzege asyryla bastady. Osy jospar aıasynda UOS múgedekteri, olarǵa teńestirilgender, tyl eńbekkerleri áleýmettik kómekke ıe bolady.
«Atalmysh jospar negizinde 33 ardagerdiń páterleri jóndeledi. Sonymen qatar, 51 ardagerdiń páterine qurylys kompanııalarynyń kómegimen aǵymdaǵy jóndeý jumystary júrgiziledi. Jumystar ústimizdegi jyldyń mamyr aıyna deıin aıaqtalady», - dedi E. Amanshaev.
E. Amanshaevtyń aıtýynsha, 2015 jylǵy 20 mamyrǵa deıin baspanaǵa zárý 7 ardagerge páter beriledi. Respýblıkalyq jáne jergilikti bıýdjet esebinen bir rettik tólemder jasalady. Kommýnaldyq tólemderdi óteý, sanıtarlyq-kýrorttyq demalys oryndaryna jiberý, tis protezdeý jáne UOS ardagerlerin qajetti dári-dármektermen qamtý sekildi kómek túrleri kórsetiledi.
Budan basqa, Jeńistiń 70 jyldyǵyna arnalǵan is-sharalar jospary negizinde elordada birqatar shyǵarmashylyq kontsertter, merekelik aktsııalar, sporttyq saıystar ótedi. Atalmysh merekege oraı Jeńis dańǵylyndaǵy gúlbaq abbatandyrylady, arnaıy bannerler ornatylady.
Qalalyq máslıhat depýtattary turǵyn úılerdiń kireberisinde ardagerlerdiń esimderi jazylǵan taqtaıshalardy ilý týraly óz oılarymen bólisti. Depýtattar óskeleń urpaqtyń, jastar arasynda nasıhat jumystaryn ótkizýge kóp kóńil bólý kerek ekendigin atap ótti.
