Astanada «Jeńiske qurmet!» kórmesi ashylady

ASTANA. QazAqparat - 4 mamyrda saǵat 16-00-de Qazaqstan Respýblıkasynyń Ulttyq mýzeıi «Stalıngrad shaıqasy» mýzeı-qoryǵymen jáne Reseı áskerı-tarıhı qoǵamynyń Volgograd bólimimen birlesip QR Mádenıet jáne sport mınıstrliginiń, RF Mádenıet mınıstrliginiń jáne «Habar» Agenttiginiń qoldaýymen Ulttyq mýzeıdiń «Ǵasyrlar qoınaýynan syr shertken Qazaqstan» jobasy aıasynda «Jeńiske qurmet!» atty kórmeniń ashylý saltanatyn ótkizedi.

Bul týraly Ulttyq mýzeıdiń baspasóz qyzmeti habarlady.

Kórme 2 bólimnen turady.

Kórmeniń 1-bólimindegi stendterge «Qazaqstan soǵys jyldarynda» taqyrybymen qazaqstandyq dıvızııalardyń sýretteri, muraǵattyq qujattary, urys joldarynyń kartalary jáne osy soǵys barysyndaǵy túbirli ózgeristiń bastaýy bolǵan «1942-1943 jyldarǵy Stalıngrad shaıqasy» kórmesiniń fotoqujattyq bólimi qoıylady.

Keńes áskerleriniń Stalıngradty qorǵaǵan jáne nemisterdiń Edil men Don ózenderiniń aralyǵyna ornalasqan iri strategııalyq tobyn talqandaǵan jaýyngerlik áreketteri 1942 jylǵy 17 shilde men 1943 jylǵy 2 aqpan aralyǵynda ótti. Stalıngrad maıdanynyń 120 bóliminiń jeke quramy men qyzmeti ornalasqan Batys Qazaqstan oblysy maıdan irgesinde bolatyn. Stalıngrad úshin shaıqasqa Qazaqstanda jasaqtalǵan 9 áskerı dıvızııa qatysty.

Qazaqstan halqynyń fashızmdi jeńýge qosqan úlesi «Soǵystyń basy, Dıvızııalardyń jasaqtalýy», «Qazaqstandyqtar soǵys maıdanynda», «Qazaqstan - maıdan arsenaly», «Tyl eńbekkerleriniń Jeńiske qosqan úlesi», «Dańq shoqjuldyzy», «Batyrlar dańqy máńgi óshpeıdi! Bul - ólilerge emes, Bul - tirilerge kerek!» atty stendterden kórinis tabady.

Respýblıkanyń mıllıondaǵan jumysshylary, kolhozshylary men zııalylary jaýdy jeńýdegi ortaq iske óz úlesterin qosyp tylda eńbek etti. Lenıngrad túbinde, Kýrsk ıininde qazaqstandyq jaýyngerler jan aıamaı shaıqasty. Dneprden ótý úshin bolǵan shaıqasta 123 qazaqstandyq Keńes Odaǵynyń Batyry ataǵyn aldy. 18 jasar Jánibek Eleýisov solardyń arasyndaǵy eń jasy boldy.

S. Nurmaǵambetov óz jaýyngerlerin Berlın úshin shaıqasqa bastap bardy. Reıhstagqa Jeńis týyn leıtenant R. Qoshqarbaev tikti.

Maıdanǵa attanǵan 1 200 000 qazaqstandyqtyń 650 000-i úıine oralmady.

498 qazaqstandyq Keńes Odaǵynyń Batyry ataǵyn aldy, 110 jaýynger Dańq ordeniniń tolyq kavaleri boldy.

Kórmeniń 2-bólimine batyrlardyń jeke zattary, maıdannan jazǵan hattary, ordenderi men medaldary, Uly Otan soǵysy kezindegi qarýlar jáne t.b. eksponattar qoıylady.