Astanada «Jeńis jolymen» atty kórme ótip jatyr

ASTANA. 4 mamyr. QazAqparat/Aınur Kenebaeva/ - Elordada «Jeńis jolymen» atty kórme óz jumysyn bastady. Búgin Astana qalasy Qazirgi zamanǵy óner murajaıynda kórmeniń saltanatty ashylý rásimi boldy.

Sharanyń negizgi maqsaty - Uly Jeńistiń 66 jyldyǵyna oraı elimizge erligimen eńbek sińirgen soǵys ardagerlerine taǵzym etý boldy.

Kórmeniń ashylý saltanatyna Uly Otan soǵysynyń ardagerleri Leonıd Kartaýzov, Alekseı Frolov jáne Alekseı Kamyshnyı qatysty.

Kórmege murajaı qorynan alynǵan 1943-1988 jyldar aralyǵynda jaryqqa shyqqan qazaqstandyq sýretshilerdiń 25 óner týyndysy qoıylǵan.

Sonyń ishinde Qadirbek Qametovtiń «Barlyǵy maıdan úshin», «Maıdannan hat», Vasılıı Tımofeevtiń «Reıhstag shabýylynyń batyry R.Qoshqarbaev» atty taqyryptyq kartınalary erekshe qyzyǵýshylyq týdyrýda.

Sonymen qatar kórkemdik ári tarıhı qundylyǵy aıryqsha kórme jurtshylyq nazaryna túrli tehnıkamen oryndalǵan maıdan men soǵys taqyrybyndaǵy ózge de keskindemelik, grafıkalyq jumystar men músinderdi usynady.

Mádenı shara barysynda arnaıy shaqyrylǵan qadirli ardagerlerge qurmet kórsetilip, merekelik kontsert uıymdastyryldy.

«Jeńis jolymen» kórmesi mamyrdyń 22 deıin jalǵaspaq.