Astanada jeńildikti kólik kartalaryn berý pýnkti tehnıkalyq sebeptermen jabyq bolady
ASTANA. QazAqparat - Tehnıkalyq sebepterge baılanysty azamattardyń jeńildetilgen sanattary úshin ASTRA PLAT kólik kartalaryn berý pýnkti jabylady. Bul týraly elordanyń resmı saıty habarlady.
«Astana LRT» JShS Tólem júıeleri ortalyǵynyń málimetine sáıkes, tehnıkalyq úzilis kartochkalardyń jalpy sanynyń jartysy berilgen ýaqytqa aldyn ala josparlanǵan bolatyn. Qazirgi kezde mamandarmen 54 myń kartanyń 26 myńǵa jýyǵy berilgen.
«Protsedýra avtomattandyrylǵan, operator arnaıy qosymshaǵa azamattyń málimetterin engizedi, sonda qajetti kartanyń qaı sektorda, qaı qorapta jatqanyn kóredi. Bul bir adamǵa 2-3 mınýttyń ishinde qyzmet kórsetýge múmkindik beredi. Osy kúnge deıin kartalardyń jartysy taratyldy. Sáıkesinshe, keıbir qorapta karta kóp, keıbirinde az. Sondyqtan, biz qalǵan kartochkalardy retteý úshin tehnıkalyq úzilisti aldyn ala josparlaǵan bolatynbyz, - dedi Tólem júıeleri ortalyǵynyń dırektory Sergeı Popov.
Eske salaıyq, 2016 jylǵy 4 mamyrda qoǵamdyq kólikte «ASTRA PLAT» elektrondy jolaqy tóleý júıesin engizý aıasynda «Jastar» saraıynda azamattardyń jeńildetilgen sanatyna ataýly kólik kartalary taratyla bastady.
Jobanyń birinshi kezeńin 31 mamyrǵa deıin iske qosý jáne ekspress pen qala mańyna qatynaıtyn marshrýttardy qamtý kózdelgen. Bul júıe tasymaldaý qyzmetteri úshin qarjy túsiminiń aıqyndylyǵyn qamtamasyz etýge, sondaı-aq jolaýshylarǵa kórsetiletin qyzmetterdiń sapasyn arttyrýǵa múmkindik beredi.
