Astanada jeńildetilgen turǵyn úı kezeginde 23 800-ge jýyq adam tur
ASTANA. 24 qazan. QazAqparat - Búginde elorda turǵyndarynyń sany kúnnen-kúnge ósip kele jatyr. Múmkin sodan da bolar, baspana máselesi eń ótkir kúıinde qalýda.
«2008 jyldan beri jyl saıyn kezekke 3-4 myń adam turady. Olar - Uly Otan soǵysynyń múgedekteri men qatysýshylary, múgedek balalary bar otbasylar, zeınetkerler, kópbalaly jáne asyraýshysynan aıyrylǵan otbasylar, memlekettik jáne bıýdjettik sala qyzmetkerleri, úıleri apatty dep tanylǵan azamattar. Jyl saıyn kezekke turǵan adamdar arasynan kezegi kelgenderiniń tizimi qalalyq «Astana aqshamy» jáne «Vechernıaıa Astana» gazetterinde, qala ákimdiginiń saıtynda jarııalanyp otyrady», - deıdi Astana qalasy turǵyn úı basqarmasy bastyǵynyń orynbasary Rýslan Ahmetov elordanyń resmı saıtyna bergen suhbatynda.
Jeńildetilgen turǵyn úı kezegine turý úshin qajetti qujattar toptamasyn ázirleý qajet. Onyń tizbesin halyqty jumyspen qamtý ortalyǵynan bilýge bolady. Sondaı-aq, tolyq aqparatpen «Qoljetimdi baspana 2020» baǵdarlamasy boıynsha Astana qalasynyń resmı saıtynan tanysa alasyz.
