Astanada jeńil atletıkadan Azııa chempıonaty ótedi
ASTANA. QazAqparat – 2023 jyldyń 10-12 aqpany aralyǵynda Astanada jeńil atletıkadan 10-shy Azııa chempıonaty ótedi. Bul týraly ákimdiktiń baspasóz qyzmetinen málim etti, dep habarlaıdy QazAqparat.
Ákimdik aqparatyna sáıkes, jarys «Qazaqstan» jeńil atletıka sport kesheniniń ǵımaratynda ótedi.
«Astana qalasynyń ákimi Altaı Kólginov pen Jeńil atletıka federatsııasynyń bas hatshysy Ashat Seısembek aldaǵy chempıonatqa daıyndyq barysyn talqylady. Kezdesýde Astanada jeńil atletıkadan mamandandyrylǵan balalar men jasóspirimder sport mektebin ashý máselesi de kóterildi», - dep málim etti baspasóz qyzmetinen.
Munymen qosa, bıyl jeltoqsanda jeńil atletıkadan Amın Tuıaqov atyndaǵy halyqaralyq týrnır uıymdastyrylady.
Qosa keteıik, taıaýda Kýveıtte ótken Azııa chempıonatynda qazaqstandyq jeńil atletter Arına Gladysheva men Sabrına Arzıeva – altyn, Anastasııa Koloda – kúmis, al Aıbol Omar qola medal jeńip alǵan edi.
Foto: ákimdiktiń baspasóz qyzmeti
