Astanada jeńgetaılyqpen aınalysqandar ustaldy
ASTANA. QazAqparat - Elorda tártip saqshylary arnaıy reıd barysynda tánin saýdalaıtyndardyń qyzmetin usynǵan 3 «jeńgetaıdy» ustady, dep habarlaıdy Astana qalasy ІІD baspasóz qyzmeti.
Qazir qalada adam saýdasy, jeńgetaılyq, prıtondardy ustaý faktileri men aqyly ıntımdi qyzmet kórsetýmen aınalysatyndardy anyqtaý jáne jolyn kesý, sonymen qatar esepke qoıý maqsatynda «Stop-Trafık» jedel aldyn alý sharasy júrgizilip jatyr.
Uıymdasqan qylmyspen kúres basqarmasy qyzmetkerleri vokzal mańyndaǵy úıler men kósheler, saýnalar, kóńil kóterý oryndary men qonaq úıler mańyn tekserdi.
Jedel aldyn alý sharasy barysynda 36 tulǵa, sonyń ishinde 3 «jeńgetaı», 30 aqyly ıntımdi qyzmet kórsetýmen aınalysýshy, 3 prıtondy ustaǵandar anyqtalyp, arnaıy esepke qoıyldy. Qabyldap-taratý ornyna Ózbekstan azamatshasy jetkizildi, QR ÁQBtK-nyń 450 baby boıynsha 3 ákimshilik hattama toltyrylǵan.
Máselen, «STOP trafık» jedel aldyn alý sharasy kezinde Astana qalasy ІІD UQKB qyzmetkerleri saýnanyń klıentimen 19 jastaǵy qyzdy aqyly ıntımdi qyzmet kórsetý úshin jolyqtyryp, jeńgetaılyq jasaǵany úshin segiz myń teńge somasynda aqshalaı syıaqy alǵan 20 jastaǵy saýna ákimshisin ustady.
Oǵan qosa, jeti myń teńge aqshalaı syıaqy alyp, saýnanyń klıentimen aqyly ıntımdi qyzmet kórsetý úshin 23 jastaǵy qyzdy jolyqtyrǵan 24 jastaǵy saýna ákimshisi quryqtaldy.
Qalalyq ІІD-ge jetkizilgender esepke alý boıynsha tekserilip, saýsaq izderi alynyp, olarmen profılakıkalyq áńgime júrgizildi.
