Astanada «Jemqorlyqqa jol joq!» aktsııasy ótip jatyr
ASTANA. Mamyrdyń 21-i. QazAqparat /Jasulan Amanbaıuly/ - Qorshaǵan ortany qorǵaý mınıstrligi, «Nur Otan» partııasynyń Astana qalalyq fılıaly jáne Qarjy polıtsııasy elordadaǵy «Qazgıdromet» mekemesinde «Jemqorlyqqa jol joq!» aktsııasyn ótkizdi,
dep habarlaıdy QazAqparat.
Shara negizinde «Qazgıdromet» ǵımaratynda jemqorlyqqa qarsy úgit-nasıhattyq plakattardyń kórmesi qoıyldy. Oǵan paraqorlyq pen jemqorlyq kórinisterine qarsy taqyrybynda balalar men eresekter arasynda ótkizilgen baıqaýdyń eń úzdik 40 jumysy qoıylǵan.
«Aktsııanyń negizgi maqsaty - halqymyzdyń jemqorlyqqa qarsy mádenıetin qalyptastyrý, sana-seziminde oǵan degen kózqarasyn ózgertý», deıdi «Nur Otan» partııasynyń Astana qalalyq fılıaly partııalyq baqylaý komıssııasy tóraǵasynyń mindetin atqarýshy Dáýletkereı Rahmetýllın.
QR Qorshaǵan ortany qorǵaý vıtse-mınıstri Májıt Turmaǵambetovtiń aıtýynsha, sharanyń «Qazgıdromet» ǵımaratynda uıymdastyrylýy mekeme ujymynyń ishinde sybaılas jemqorlyqtyń beleń alǵandyǵyn bildirmeıdi. «Qorshaǵan ortany qorǵaý mınıstrligi jemqorlyqpen kúres jumystaryn aldyńǵy qatarda ustaıdy. Sondyqtan vedomstvonyń jyl basyndaǵy otyrysynda osy jumysty qoǵamdyq uıymdarmen, partııalyq qurylymdarmen birge atqarý mindeti qoıylǵan bolatyn», deıdi ol.
«Sybaılas jemqorlyq eldegi áleýmettik-konomıkalyq úderisterdi tejep qana qoımaı, saıası, azamattyq ınstıtýttardyń damýyna da qaýip tóndiredi. Bunyń aldyn alý úshin halyq osy qaýipterdi túısinýi qajet», deıdi QR Qorshaǵan ortany qorǵaý vıtse-mınıstri Májıt Turmaǵambetov.
«Nur Otan» partııasy kelesi osyndaı sharany Qarjy mınıstrliginde ótkizbek.
