Astanada jemqorlyqqa qarsy tuńǵysh respýblıkalyq aqyndar aıtysy ótedi
Qoǵam men azamattyq jaýapkershilikti, sybaılas jemqorlyqqa qarsy kúresti dáriptegen erekshe aıtys І.Omarov atyndaǵy qazaq drama teatrynda uıymdastyryldy.
Agenttiktiń oblystyq departamenti basshysy Salaýat Múksimovtiń aıtýynsha, bul bastamany Alık Shpekbaev qýana qoldaǵan.
«Qazirgi memlekettik saıasattyń kún tártibinde jemqorlyqqa qarsy mádenıetti qalyptastyrý máselesi tur. Qazir biz jemqorlyqpen kúresýge barynsha kúsh jumyldyryp jatyrmyz. Sondyqtan bul shara buqaralyq sıpatqa ıe bolýy kerek. Búgingi aıtystyń basty maqsaty - aýzy dýaly aqyndardyń ótkir jyry arqyly qoǵamǵa oı tastaý», - dedi oblystyq departamenttiń basshysy.
Óner saıysyn tamashalaýǵa Sybaılas jemqorlyqqa qarsy agenttiktiń qoǵammen baılanys basqarmasynyń basshysy Arman Berdalın keldi.
«Aqyndar qashanda aqıqatty ashyp, shyndyqty shyryldatyp jetkizedi. Osy bir-eki kúnde Astanada halyqaralyq aıtys bolaıyn dep jatyr. Ol jerde de kileń «sen tur, men ataıyn» deıtin aqyndar jınalyp, qazirgi qoǵamda bolyp jatqan naǵyz ózekti máselelerdi qozǵaǵaly otyr. Al qazirgi qoǵamdaǵy eń ózekti másele - búgingi aıtysqa arqaý bolyp otyrǵan sybaılas jemqorlyq. Jalpy, jemqorlyq taqyrybynda birinshi aıtysty Qostanaıdan bastap otyrmyz. Sebebi,bul ólkeden eki birdeı halyq aqyny shyqty. Aldaǵy ýaqytta Astanada jemqorlyqqa qarsy respýblıkalyq aıtys ótkizemiz» - dedi Arman Berdalın. 
Sonymen, aıtysqa Saltanat Ótelbaeva, Marǵulan Ospanov, Mamaı Іzteleý, Ásem Qajı syndy aqyndar qatysty. Aqyndar emhana, balabaqsha, bilim oshaqtary sııaqty áleýmettik salalarda beleń alyp turǵan jeń ushynan jalǵasý men «kóz qysty, barmaq basty» tamyr-tanystyqty sóz etti.
Óleńderimen jemqor sheneýnikterdi sheneı otyryp, qoǵamdyq keselge qarsy qaýqar tanyta almaı otyrǵan halyqty synady. Arman Berdalın aıtqandaı, aıtyskerlerdiń kózdegen maqsaty jeńiske jetip, júlde alý emes, jemqorlyqqa qarsy úndeý tastap, kópshilikti qoǵamdyq indetke qarsy ymyrasyz kúreske shaqyrý boldy.
