Astanada jemqorlyq deńgeıi azaıdy - Alık Shpekbaev
ASTANA. QazAqparat - Elordada jemqorlyqtyń aldyn alý jumystarynyń tıimdi júrgizilýiniń nátıjesinde jemqorlyq deńgeıi aıtarlyqtaı azaıdy. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev málim etti, dep habarlaıdy QazAqparat tilshisi.
«Búgin aldaryńyzda Astana - adaldyq alańy» jobasynyń aıasynda «Open space» ozyq tehnologııasy tanystyrylýda. Bul jańashyldyq sybaılas jemqorlyqqa qarsy saıasatty iske asyrýdyń barlyq talaptaryna sáıkes keledi. ıAǵnı qyzmet alýshymen jasalatyn dıalog barynsha ashyq bolady. Bizdiń agenttik pen qala ákimdiginiń birlesip júrgizgen atalǵan tıimdi jobanyń arqasynda Astanada jemqorlyq deıgeıi aıtarlyqtaı azaıdy», - dedi A.Shpekbaev jınalys barysynda.
Ulttyq bıýro basshysy jemqorlyqtyń aldyn alý men halyqpen ashyq jumys jasaýda elorda ákimdikteriniń áleýmettik jeli paraqshalarynyń belsendi jumys isteıtinin aıta kele, ol óz kezeginde halyqqa jaqyn bolýdyń jáne turǵyndarmen tikeleı jumys isteýdiń birden-bir quraly ekenin aıtty.
Jınalys barysynda memlekettik organdardyń qoljetimdiligin qamtamasyz etý, olardyń qyzmetiniń ashyqtyǵy, sondaı-aq qoǵamdyq baqylaýdyń jańa ádisterin ázirleý salasynda «Astana- adaldyq alańy» jobasynyń aıasynda atqarylǵan jumystardyń nátıjeleri usynyldy.
Joba jumysynyń tıimdiligi retinde Astana qalasy Saryarqa aýdany ákimdiginde qurylǵan front-keńse jumysy tanystyryldy. Open space dep atalatyn keńsede 177 túrli sıtýatsııalyq máseleler boıynsha, 12 operator jumys isteıdi. Ústimizdegi jyly qazan aıynda pılottyq rejimde qosylǵan front-keńsege osy ýaqyt aralyǵynda 7 myńnan astam adam túrli suraqtar boıynsha 365-ten astam ótinish qaldyrǵan. Onyń ishinde memlekettik qyzmet kórsetýden bastap mektep, balabaqsha jáne aýrýhanalarǵa qatysty máseleler de bar.
Aıta keteıik, aǵymdaǵy jyldyń aqpan aıynda Astana qalasy ákimdigi men Memlekettik qyzmet isteri jáne sybaılas jemqorlyqqa qarsy is-qımyl agenttiginiń birlesken sybaılas jemqorlyqqa qarsy «Astana -adaldyq alańy» jobasy júzege asyrylýda. Ondaǵy maqsat- turmystyq jemqorlyqty joıý, memlekettik organdar qyzmetiniń ashyqtyǵy men qoljetimdiligin qamtamasyz etý jáne halyqty keń aýqymdy qoǵamdyq baqylaýda qamtamasyz etý.
