Astanada jemqorlyq áreketteri týraly tikeleı xabar berýge bolady

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamenti «Qoǵamdyq baqylaý kartasy» atty jobaǵa qatysýǵa úndedi. Joba aıasynda azamattar jemqorlyq áreketteri týraly xabardy onlaın rejimde bere alady, dep xabarlaıdy QazAqparat tilshisi.

Sybaılas jemqorlyqtyń aldyn alý basqarmasy basshysynyń mindetin atqarýshy Danııar Raımbaevtyń aıtýynsha, qoǵamdyq baqylaý kartasy aıasynda kez kelgen adam áleýmettik jeliler men messendjerler arqyly óz aryzyn jibere alady. Arnaıy baılanys ortalyǵyna da xabar túsirýge bolady.

«Máselen, joldy jóndeý jumystary sapasyz atqarylsa, nemese sý qubyryn ýaqytynda jasamasa departamentke xabar berýge bolady. Ol aqparattyń barlyǵy jedel túrde qaralady. Qazirgi kezde Feısbýk, Vkontakte, Instagram sııaqty tanymal áleýmettik jelilerde arnaıy paraqshalar ashyldy. [phone] nómiri boıynsha WhatsApp pen Telegram-da chattar bar. Oǵan tártip buzýshylyqtyń fotosyn da, vıdeosyn da jiberýge bolady. Budan bólek, 57-19-91 telefon nómiri boıynsha departamenttiń qaýyrt jelisine xabarlasýǵa múmkindik bar», - dedi D.Raıymbaev Astanada ótken baspasóz máslıxatynda.
 

Onyń aıtýynsha, Qamqor atty qosymshany júktep alýǵa da bolady. Ony QR Bas prokýratýrasynyń quqyqtyq statıstıka jáne arnaıy esepke alý komıteti ázirledi. Atalǵan mobıldi qosymsha arqyly barlyq aryz-shaǵymdar qabyldanady.