Astanada jelilik saıabaq pen Prezıdent kitaphanasynyń qurylysy qashan aıaqtalady – ákimdik jaýaby
ASTANA. KAZINFORM – Astanada Abý-Dabı Plaza kesheni aýmaǵynan bastap Botanıkalyq baqqa deıin jetetin jelilik saıabaq salynyp jatyr. Sonymen qatar Prezıdent kitaphanasyn salýǵa jer bólindi.
Ákimdiktiń habarlaýynsha, 2024 jylǵy 9 aqpanda kelisilgen eskızdik joba bar. Atalǵan jobaǵa sáıkes, jelilik saıabaq Abý-Dabı Plaza kesheni men Botanıkalyq baq arasyn jalǵaý qajet. Joba qalanyń Bas josparyna sáıkes keledi jáne ózara baılanysqan, ekologııalyq turǵydan da qalalyq qurylymdy qalyptastyrýǵa baǵyttalǵan.
Abattandyrý jumysyn qalanyń qorshaǵan ortany qorǵaý jáne tabıǵatty paıdalaný basqarmasy júrgizip jatyr. Saıabaq aýmaǵynda izdestirý jáne jobalaý jumysyn júrgizýge ruqsat 2023 jylǵy 1 shildede ákimdik qaýlysymen 3 jyl merzimge berilgen.
Osylaısha, jelilik saıabaqtyń negizgi bóligin abattandyrý 2026 jyly aıaqtalady dep kútilip otyr.
Sonymen qatar, Almaty- Túrkistan- Kereı-Jánibek handar jáne Aqmeshit kósheleri qıylysyndaǵy saıabaq aýmaǵynyń bir bóligi jekemenshikke berilip, ol jer Prezıdent kitaphanasyn salýǵa bólingen.
- Qalalyq ákimdiktiń 2023 jylǵy 29 jeltoqsandaǵy № 510-2846 qaýlysymen QR Prezıdenti Іsteri basqarmasyna jalpy kólemi 4,4675 ga bolatyn aýmaqta Prezıdent kitaphanasyna izdestirý jáne jobalaý jumysyn júrgizýge 2028 jylǵy 19 jeltoqsanǵa deıin ruqsat berildi, - dep jaýap berdi elorda ákimdigi agenttik joldaǵan resmı saýalǵa.
Eske salaıyq, bıyl kóktemde Astana ákimi Jeńis Qasymbek jelilik saıabaq qurylysyna qatysty pikir bildirgen edi.
Sondaı-aq elorda aýdandarynda ashylatyn jańa saıabaqtar týraly jazǵan edik.